Praımerız: Túrkistan oblysynda 80 myńǵa jýyq adam daýys beredi

TÚRKІSTAN. QazAqparat - Túrkistan oblysynda jurtshylyq praımerızge onlaın rejımde belsendi túrde daýys berýde. Óńirde búginnen bastap óz tańdaýlaryn jasaýǵa kirisken túrkistandyqtar kadrlyq rezervtiń myqty azamattarmen tolyǵýyna múddeli, dep habarlaıdy QazAqparat tilshisi.

Sońǵy málimetterge sáıkes, praımerızge oblystyń barlyq aýdan-qalalarynan 1076 adam qatysyp jatyr. Onyń ishinde bastaýysh partııa uıymdarynan – 207 (19,2%), ózin-ózi usynǵan – 869 (80,8%), áıelderdiń úlesi – 353 (32,8%), jastardyń úlesi – 312-ni (28,9%) quraǵan. Oblys boıynsha bir orynǵa orta eseppen 4 adamnan tirkelgen. Jalpy óńirde oblystyq jáne jergilikti máslıhattarda 320 oryn bar. Al, 1-3 qazan aralyǵynda ótetin daýys berýge 78262 partııa múshesi qatysady dep josparlanǵan. Olar 245 bastaýysh partııa uıymdaryna bekitilgen. Oblystyń aýdan, qalalarynda 209 daýys berý orny belgilendi. Onyń ishinde 170 orynda daýys onlaın formatta, 39 orynda dástúrli qaǵaz bıýlletenimen beriledi.

Daýys berýge qatysatyn 78262 partııa múshesiniń 68183 (87,1%) onlaın, 10079 (12,3%) qaǵaz bıýletenmen daýys beredi. Onlaın daýys berý oryndary 600-ge jýyq kompıýtermen qamtamasyz etilgen. Jalpy osy praımerız barysynda oblystyq jáne aýdan, qaladaǵy fılıaldar 77 myńdaı azamatty avtorızatsııadan ótkizgen. Partııa múshelerin túgendeý boıynsha aýqymdy jumystar atqarylǵan. Bul baǵytta úgit-nasıhat jumystary júrgizilip, 14-30 qyrkúıek aralyǵynda 233 debat uıymdastyrylǵan.