Praımerız: Shyǵys Qazaqstannan Májiliske 6 úmitker tirkeldi
SEMEI. QazAqparat – «Nur Otan» partııasynyń Shyǵys Qazaqstan oblystyq fılıalynyń kezekten tys HHIV konferentsııasy ótip, oǵan 139 delegat qatysty, dep habarlaıdy QazAqparat tilshisi.
Konferentsııada partııanyń oblystyq bes jyldyq saılaýaldy baǵdarlamasy bekitildi.
«QR Prezıdentiniń «Halyq únine qulaq asatyn memleket» tujyrymdamasyn iske asyrý sheńberinde baǵdarlamanyń barlyq jobalary praımerız barysynda halyqpen keńinen talqylandy. 1315 usynys jınalyp, onyń 1036-sy qabyldanǵany óńirlik baǵdarlamada eskerildi. Oblystyq máslıhatqa 64 adamnan turatyn partııalyq tizim bekitildi. Taldaý nátıjeleri tizimdegi áıelderdiń úlesi 32,8%-ǵa, al 35 jasqa deıingi jastardyń úlesi 23,4%-ǵa deıin óskenin kórsetti», - dep habarlady «Nur Otan» partııasy ShQOF baspasóz qyzmeti.
Úmitkerlerdiń ortasha jasy 53-ten 46-ǵa, ıaǵnı 7 jasqa deıin jasardy. Sondaı-aq oblystyq máslıhattaǵy «Nur Otan» partııasynyń tizimi 64%-ǵa jańa quram. Bul qoǵamnyń jańarý suranysyn qanaǵattandyrýǵa múmkindik berip otyr.
«Debattarǵa qatysqan 15 úmitkerdiń altaýy daýys berý qorytyndysy boıynsha QR Parlamenti Májilisine úmitker boldy. Konferentsııa men qoǵamdyq pikirtalastar áleýmettik jelilerde onlaın rejıminde taratylǵan. Sonymen qatar konferentsııada 2020 jyldyń 25 qarashasynda ótetin «Nur Otan» partııasynyń kezekten tys XX sezine oblystan 25 delegat saılandy», - delingen habarlamada.
