Praımerız: Kásipodaq belsendileri saılaýaldy baǵdarlamada qandaı másele kóteredi

NUR-SULTAN. QazAqparat – «Nur Otan»-nyń partııaishilik praımerızine qatysýshy kásipodaq belsendileri saılaýaldy baǵdarlamada qandaı máselelerdi kóteretinin aıtty, dep habarlaıdy QazAqparat tilshisi.

«Praımerız kásipodaq belsendilerine úlken múmkindikter beredi. Bizdiń kásipodaqtyń basty mindeti – eńbek adamyna qoldaý kórsetý. Meniń saılaýaldy baǵdarlamamnyń basym mindetteri - áleýmettik jańǵyrtý kýrsyn júzege asyrý, laıyqty jalaqy engizý. Sonymen qatar, qaýipsiz eńbek jaǵdaıyn jasaý, jumysshylardyń eńbek quqyqtaryn qamtamasyz etý, qashyqtan jumys isteýdiń quqyqtyq mártebesin anyqtaý jáne naqtylaý. Ár qatysýshyǵa sáttilik pen jetistik tileımin. Eger bizdiń strategııamyz júzege assa – jumysymyz nátıjeli bolmaq», - deıdi «YNTYMAQ» salalyq kásipodaq tóraǵasy Qaıraqbaı Jańabekov óziniń saılaýaldy baǵdarlamasy týraly.

Praımerızge Qazaqstannyń bilim jáne ǵylym qyzmetkerleriniń salalyq kásipodaǵy tóraǵasynyń orynbasary Álııa Ábıeva da qatysýda. Ol óziniń saılaýaldy baǵdarlamasynda laıyqty jalaqy, ana men balany qorǵaý máselelerin qamtıtynyn aıtty.

«Bul jıynǵa eldiń áleýmettik-ekonomıkalyq jaǵdaıyn jaqsartqysy keletin, qoǵamnyń ıgiligi úshin qyzmet etýge daıyn qamqor adamdar jınaldy. Biz bárimiz bir partııanyń múshesimiz, bizdiń maqsatymyz bir. Sondyqtan jeńimpazdardyń barlyǵy osynda. Men saılaýaldy baǵdarlamamnyń úsh ereksheligi bar ekenin baıqadym. Birinshiden, bul áleýmettik jelini júrgizý. Bul, árbir qatysýshy úshin mańyzdy. Ózimniń saılaý naýqanymda kreatıvti beınematerıaldar jasaǵanymdy atap ótkim keledi. Sonymen qatar, áleýmettik jobalar men jarnamalyq aktsııalarǵa qatysý óte mańyzdy. Jaqynda «Bilimdi el» ıgi is-sharasyna qatystym. Saılaýaldy baǵdarlamam týraly aıtar bolsam, men laıyqty jumys pen jalaqy, ana men balany qorǵaý, salaýatty ımıdj, jas mamandar men talantty jastardy qoldaýdy qoldaımyn», - deıdi Álııa Abıeva.

Al Sherzod Pýlatovtyń aıtýynsha, onyń saılaýaldy baǵdarlamasynyń mańyzdy baǵyty memlekettik tilmen, etnosaralyq qatynaspen baılanysty.

«Saılaýaldy baǵdarlamamyzǵa osy máselelerdi qossaq – jetistikke jetemiz dep oılaımyn. Sonymen qatar, belsendi bolyp, áleýmettik jelilerde qandaı máselege kóńil bóletinimizdi aıtyp otyrsaq – nátıje bolady», - deıdi ol.