Praımerız: Aqtóbe oblysynda 14 myńǵa jýyq partııa múshesi óz tańdaýyn jasady

AQTÓBE. QazAqparat - Aqtóbede «Nur Otan» partııasy ókilderiniń daýys berýi belsendi ótip jatyr, dep habarlaıdy QazAqparat tilshisi.

Partııaishilik saılaýda daýys berýdiń ekinshi kúni, ıaǵnı, 2-qazanda saǵat 12-00 deıin 13938 myń nurotandyqtyń daýys bergeni belgili boldy. Olardyń basym bóligi Aqtóbe qalasy men Shalqar, Muǵaljar, Hromtaý aýdandarynan.

Jalpy oblysymyzda «Nur Otan» partııasynyń 30896 múshesi 1-3 qazan aralyǵynda ótetin daýys berýge qatysady dep josparlanǵan. Olar 211 bastaýysh partııa uıymyna biriktirilgen.

Osyǵan deıin oblystyń qala, aýdandarynda 118 daýys berý orny belgilendi. Onyń 76-y onlaın formatta, 46 ýchastokte dástúrli qaǵaz bıýlletenimen daýys beredi.

«Praımerızge oblystyń barlyq aýdan, qalalarynan 460 kandıdat qatysyp jatyr. Onyń ishinde bastaýysh partııa uıymdarynan –232, ózin-ózi usynǵan – 228. Áıelderdiń úlesi –169, jastardyń úlesi – 129 qurady. Oblys boıynsha bir orynǵa orta eseppen 3 adamnan tirkeldi. Jalpy óńirde oblystyq jáne jergilikti máslıhattarda 202 oryn bar.

Daýys berýge qatysatyn 30896 partııa múshesiniń 27400-i (88,7%) onlaın, 3496-sy (11,3%) qaǵaz bıýletenmen daýys beredi. Onlaın daýys berý oryndary 205 kompıýtermen jáne ınternetpen qamtamasyz etildi. Praımerız barysynda partııanyń oblystyq, aýdandyq jáne qalalyq fılıaldary 30,7 myńnan astam partııa múshesine avtorızatsııa júrgizdi. Daýys berýdiń sońǵy kúni bastaýysh partııa uıymdarynyń bazasynda saılaý ýchaskeleri ashylady. Aqtóbe oblysynda olardyń sany 118», - dep habarlady «Nur Otan» partııasynyń AOF baspasóz qyzmeti.