Praımerız: Aqtóbe oblysynan Májiliske 4 úmitker tirkeldi

AQTÓBE. QazAqparat - Aqtóbe oblysynan usynylǵan úmitkerlerdiń ishinde jastar jáne medıtsına qyzmetkeri bar. Olar «Nur Otan» partııasy Aqtóbe oblystyq fılıalynyń kezekten tys XXX konferentsııasynda pikirsaıys pen daýys berý qorytyndysy arqyly anyqtaldy, dep habarlaıdy QazAqparat tilshisi.

Óńirde úmitkerler arasynda pikirsaıys ótti. Olar óz saılaýaldy baǵdarlamasyn tanystyryp, jobalaryn usyndy. Keıbiri ózekti máselelerdi qozǵap, sheshý jolyn kórsetti.

Pikirsaıys qorytyndysy boıynsha 15 úmitkerge «Praımerız» aqparattyq júıesi arqyly 109 delegat daýys berdi. Nátıjesinde eń kóp upaı jınaǵan tórteýi oblystyń ókildik kvotasyna sáıkes Májilistegi partııalyq tizimge úmitker retinde tirkeldi.

Nátıjesinde Grek-rım, erkin jáne áıelder kúresi oblystyq federatsııasynyń prezıdenti Rahat Sydyqov eń kóp daýys jınady. Ekinshi oryndy 96 daýyspen memlekettik qyzmetker Amanǵalı Berdalın ıelendi.

Sonymen birge tizimge «DARU Medical Group» bas dırektory Ǵalymjan Eleýov, «Jas Otan» jastar qanaty Aqtóbe oblystyq fılıalynyń tóraǵasy Asyljan Búrkitalın kirdi.

«Praımerız – bizdiń ortaq jeńisimiz. Maqsat bir. Ol maqsat – el men halyqqa qyzmet etý, memleketimizdi kórkeıtý. Pikirsaıys barysynda túrli másele kóterildi, onyń sheshý joldary da aıtyldy. Munda «júzden júırik, myńnan tulpar» degendeı eń úzdigi anyqtaldy», - dedi partııanyń oblystyq fılıalynyń tóraǵasy, oblys ákimi Ońdasyn Orazalın. Konferentsııada oblystyq máslıhatqa 50 adamnan turatyn partııalyq tizim bekitildi. Onyń ishinde áıelderdiń úlesi 9 paıyzdan 30 paıyzǵa al 35 jasqa deıingi jastar qatary 20 paıyzǵa artty. Tizimdegilerdiń 41 paıyzyn shaǵyn jáne orta bıznes ókilderi qurady. Al bilim berý salasy 13 paıyz, kvazımemlekettik sektor – 8 paıyz.

Aıta ketý kerek, oblys boıynsha praımerızdiń birinshi kezeńine 460 úmitker qatysty. Onyń 36,7 paıyzyn áıelder, 28 paıyzyn 35 jasqa deıingi jastar qurady.

Daýys berýge 28,6 myńnan astam partııa múshesi qatysty.