Praımerız: Aqtóbe qalalyq máslıhatyna arnalǵan tiziminde áıelderdiń úlesi 6 esege artty

AQTÓBE. QazAqparat - «Nur Otan» partııasy Aqtóbe qalalyq fılıalynyń kezekten tys HHXII konferentsııasy ótip, qalalyq máslıhatqa arnalǵan partııalyq tizim anyqtaldy. Burynǵy shaqyrylymnyń depýtattarymen salystyrǵanda tizimdegi áıelderdiń úlesi 25 paıyzǵa, al jastardyń úlesi 21 paıyzǵa artty, dep habarlaıdy QazAqparat tilshisi.

Partııaishilik irikteýdiń ekinshi kezeńi aıasynda partııanyń qalalyq fılıalynyń konferentsııasyna 34 kandıdat qatysyp, debat qorytyndysy boıynsha daýys berildi. Eń kóp daýys jınaǵan 17 kandıdat oblystyq máslıhat depýtattarynyń saılaýyna qatysý úshin partııalyq tizimge usynyldy. Sondaı-aq qalalyq máslıhattaǵy 30 orynǵa 43 adamnan turatyn partııalyq tizim bekitildi.
Taldaý nátıjesi kórsetkendeı, tizimdegi áıelderdiń úlesi 5 paıyzdan 30 paıyzǵa deıin, al 35 jasqa deıingi jastar úlesi 21 paıyzǵa ósti. Tizimdegi adamdardyń 51 paıyzyn shaǵyn jáne orta bıznes ókilderi qurady. Sondaı-aq, konferentsııada qalalyq fılıaldyń saılaýaldy baǵdarlamasy bekitilip, partııanyń oblystyq fılıalynyń konferentsııasyna delegattar saılandy.
Aıta keteıik, partııalyq ishki irikteýdiń birinshi kezeńine Aqtóbe qalasy boıynsha 138 kandıdat qatysty. Onyń 32% áıel, 27 paıyzy 35 jasqa deıingi jastar. 12 myńnan astam partııa múshesi daýys berýge qatysty.