Pravesh Kýmar Gýpta Quryltaı saılaýyn Qazaqstannyń saıası evolıýtsııasyndaǵy mańyzdy kezeń dep atady
ASTANA. KAZINFORM – 23 tamyzǵa belgilengen jańa bir palataly Quryltaı depýtattarynyń alǵashqy saılaýy sheteldik sarapshylar qaýymdastyǵynyń da nazaryn aýdaryp otyr. Úndistandyq saıasattanýshy Pravesh Kýmar Gýpta bul naýqannyń mańyzyn konstıtýtsııalyq reformalardyń is júzinde júzege asyrylýymen, saıası turaqtylyqtyń saqtalýymen jáne Qazaqstan men Úndistan arasyndaǵy yntymaqtastyqtyń nyǵaıýymen baılanystyrady.
Pravesh Kýmar Gýpta — Úndistandaǵy jetekshi saraptamalyq ortalyqtardyń biri Vivekananda International Foundation ǵylymı qyzmetkeri.
Ol Nıý-Delıdegi Djavaharlal Nerý ýnıversıtetinde Ortalyq Azııa máseleleri boıynsha doktorlyq dárejesin qorǵaǵan. Kóp jyldan beri Ortalyq jáne Ońtústik Azııa elderindegi saıası ári qoǵamdyq úderisterdi zerttep júr.
Aldaǵy saılaýdy jańartylǵan konstıtýtsııalyq júıe aıasynda baǵalaǵan sarapshy ókildi bıliktiń jańa modeliniń is júzindegi qyzmeti bastalatynyna nazar aýdardy. Onyń aıtýynsha, saılaýdyń mańyzy tek depýtattyq korpýsty qalyptastyrýmen shektelmeıdi, sonymen qatar parlamenttiń jańarǵan qurylymyn ornyqtyrýǵa da baǵyttalǵan.
— Aldaǵy Quryltaı saılaýy Qazaqstannyń saıası evolıýtsııasyndaǵy mańyzdy kezeńdi bildiredi. Bul — eldiń jańa Konstıtýtsııasyna sáıkes ótkiziletin alǵashqy parlamenttik saılaý. Ol basqarý júısiniń jańa modeline — bir palataly Quryltaıǵa kóshýdi kórsetedi. Bul úderis memlekettiń saıası júıesin jetildirýge baǵyttalǵan keń aýqymdy reformalardyń bir bóligi, — dedi sarapshy.
Pravesh Kýmar Gýpta aldaǵy saılaýǵa halyqaralyq yntymaqtastyq turǵysynan da baǵa berdi. Onyń pikirinshe, turaqty saıası orta men memlekettik ınstıtýttardyń júıeli jumysy uzaq merzimdi birlesken bastamalardy júzege asyrýǵa berik negiz qalaıdy.
— Qazaqstan — Úndistannyń asa mańyzdy seriktesi. Eldegi saıası turaqtylyq pen memlekettik ınstıtýttardyń sabaqtastyǵy óńirlik yntymaqtastyqty damytý, kólik baılanysyn nyǵaıtý, saýda kólemin keńeıtý jáne qaýipsizdikti qamtamasyz etý úshin sheshýshi ról oınaıdy, — dep atap ótti sarapshy.
Sóz sońynda úndistandyq saıasattanýshy aldaǵy kezeńge qatysty oń pikir bildirip, josparlanǵan reformalardyń tabysty júzege asýyna tilektestik tanytty.
— Qorytyndylaı kele, Qazaqstanǵa damý jolyndaǵy osy jańa kezeńde tabys tileımin. Elge beıbitshilik, órkendeý jáne josparlanǵan barlyq reformanyń sátti júzege asýyn tileımin, — dedi Pravesh Kýmar Gýpta.
Osylaısha, Pravesh Kýmar Gýptanyń pikirinshe, 23 tamyzdaǵy saılaý tek ishki saıasatta ǵana emes, halyqaralyq mańyzǵa da ıe.
Jańa Quryltaıdyń qalyptasýy jańartylǵan parlamenttik modeldi is júzinde júzege asyrýdaǵy mańyzdy kezeń bolmaq.
Al saıası turaqtylyq pen memlekettik ınstıtýttardyń sabaqtastyǵy Qazaqstan men Úndistan arasyndaǵy saýda, kólik baılanysy jáne óńirlik qaýipsizdik salalaryndaǵy yntymaqtastyqtyń odan ary damýyna yqpal etedi.
