Praktıkter dıplomdyq jobaǵa jetekshi bola alady – QR BǴM
«Biz joǵary jáne joǵary oqý ornynan keıingi bilim deńgeıi boıynsha memlekettik jalpy bilim berý standartyn ózgerttik. Endi dıplomdyq jobalardy jazýǵa nemese daıyndaýǵa jetekshi retinde praktıkter tartylýy múmkin. Bul – JOO-lardaǵy óndiris pen teorııalyq oqýdy baılanystyrýǵa kómektesetin mańyzdy ózgeris. Sonymen birge, biz jalpyeýropalyq dıplom qosymshasy bilim alýshylarǵa tegin beriledi degen normany engizdik. JOO-lar osy qujatty bergeni úshin aqy almaýy kerek», - dedi M. Dáýlenov Ortalyq kommýnıkatsııalar qyzmetinde ótken brıfıngte.
Odan bólek, mınıstrlik memlekettik bilim berý tapsyrysyn ornalastyrýda JOO-larǵa qoıylatyn talaptardy kóterdi. Granttardy respýblıkalyq komıssııa bóledi. Bıyl memlekettik bilim grantyn ornalastyrýǵa 36 joǵary oqý orny jiberilmedi. Onyń negizgi sebepteri – qate derekter berý, sapanyń tómendigi jáne jumysqa ornalasý deńgeıiniń tómendigi.
«Bilim berý grantynyń quny artty. Ony arttyrýda mınıstr oqytýshylardyń jalaqysyn kóterý mindetin qoıdy. 2020 jyldyń birinshi qyrkúıeginen bastap memlekettik JOO-larda jalaqy orta eseppen 210 myń teńgege deıin, ulttyq joǵary oqý oryndarynda – 283 myń teńgege deıin kóterildi. Biz sapasyz bilim beretin joǵary oqý oryndaryn ońtaılandyrý boıynsha da jumys isteımiz. Jyl basynan beri 26 JOO-da kásibı tekserý júrgizildi, jyl sońyna deıin taǵy bes JOO-da josparlanǵan. Tekserýler qoldanystaǵy zańnamaǵa sáıkes júrgiziledi. Nátıjesinde, bıyl 5 JOO jabyldy, eki JOO boıynsha mınıstrliktiń bas lıtsenzııadan aıyrý týraly qaýlysy qabyldandy», - deıdi vıtse-mınıstr.
Stýdentter úshin qorqatyn eshteńe joq. Erejege sáıkes, stýdentter semestrdiń aıaqtalýyn kútpesten basqa ýnıversıtetterge aýysa alady.
«Biz qazir qoldanystaǵy zańnamaǵa ózgeris engizýdemiz. Eger JOO-da lıtsenzııa toqtatylsa, stýdentter basqa JOO-ǵa aýysa alady. 25 JOO kadr daıarlaýda beıini joq baǵyttar boıynsha lıtsenzııaǵa 60 qosymshadan aıyryldy. Biz pedagogıkalyq joǵary oqý oryndarynyń zańgerlerdi, ekonomısterdi oqytpaýy úshin, pedagogıkalyq kadrlardyń sapasyn arttyrýy úshin jumys istep jatyrmyz», - dedi Mıras Dáýlenov.
