Pragmatızm men tepe-teńdik: Qazaqstan men Reseıdiń energetıkalyq áriptestigi qalaı damyp keledi
ASTANA. KAZINFORM - Qazaqstan men Reseı Federatsııasy energetıka salasyndaǵy uzaq merzimdi ári ózara tıimdi yntymaqtastyqty jalǵastyryp keledi. Bul baǵyt eki el arasyndaǵy strategııalyq áriptestiktiń mańyzdy tetikteriniń biri bolyp qala beredi.
QR Energetıka mınıstrligi baspasóz qyzmetiniń habarlaýynsha, ózara is-qımyl otyn-energetıka kesheniniń barlaý jáne óndirý, elektr energetıkasy men resýrstardy tasymaldaý sekildi keń aýqymdy salalaryn qamtıdy. Búginde salalyq vedomstvolardyń jumysy ózara ýaǵdalastyqtardyń berik negizinde qurylǵan: birlesken jobalar turaqty ári tıimdi iske asyrylyp, barlyq jumys úderisteri syndarly jáne jedel túrde sheshimin taýyp jatyr.
Taraptar energetıkalyq qaýipsizdik máselelerine, ulttyq energetıkalyq júıelerdiń turaqty jumys isteýine jáne kólik-logıstıkalyq dálizderdiń tıimdiligin arttyrýǵa erekshe nazar aýdaryp otyr.
Munaı salasynda eksporttyq baǵyttar turaqty ári úzdiksiz jumys istep tur. Atap aıtqanda, Kaspıı qubyr konsortsıýmynyń (KQK) ınfraqurylymyn paıdalaný negizgi basymdyqtardyń biri bolyp qalyp otyr. Bul baǵyt qazaqstandyq munaıdy syrtqy naryqtarǵa senimdi jetkizýde mańyzdy ról atqarady.
Gaz salasynda kómirsýtekterdi óńdeý jáne tabıǵı gazdyń óńirlik tranzıtin qamtamasyz etý máseleleri boıynsha kooperatsııa keńeıip keledi. Mundaı dıalog óńirdiń energetıkalyq baılanysyn nyǵaıtyp, tutynýshylardy senimdi qamtamasyz etý deńgeıin arttyrýǵa yqpal etedi.
Ulttyq elektr jelileriniń qatar jumys isteýi de óziniń tıimdiligin dáleldep otyr. Elektr energetıkasy salasynda biryńǵaı teńgerimdi saqtaý, elektr energııasymen tehnıkalyq almasý jáne energııamen jabdyqtaýdyń ózara senimdiligin qamtamasyz etý baǵytynda dıspetcherlik ortalyqtardyń ózara is-qımyly turaqty túrde kúsheıip keledi.
Qazaqstan men Reseı arasyndaǵy energetıkalyq áriptestik óńirlik turaqtylyqtyń mańyzdy faktory bolyp qala otyryp, eki eldiń makroekonomıkalyq damýyna senimdi serpin berýde.
Osyǵan deıin Qazaqstan men Reseı birlesken energetıkalyq jobalardy talqylaǵan bolatyn.
