Pragadaǵy vokzal mańynda eki jolaýshylar poıyzy soqtyǵysty

ASTANA. KAZINFORM — Búgin, 17 qarashada Pragadaǵy negizgi temirjol vokzalynyń mańynda eki jolaýshylar poıyzy soqtyǵysty. Bul týraly Kazinform agenttigi BILD basylymyna silteme jasap habarlaıdy.

Pragadaǵy vokzal mańynda eki jolaýshylar poıyzy soqtyǵysty
Foto: BILD

Apat saldarynan 46 adam zardap shekti. Olardyń tórteýi aýyr jaraqat alǵan. Jergilikti bıliktiń málimetinshe, zardap shekkenderdiń ómirine qaýip tónip tur.

Oqıǵa tańǵy saǵat jetiler shamasynda Seıfertova kóshesiniń ústindegi temirjol kópirinde bolǵan. Poıyzdardyń biri Mlada-Boleslav qalasynan shyqsa, ekinshisi Mılovıtse qalasyna baǵyt alǵan. Eki quramnyń bir jolǵa qalaı shyǵyp ketkeni ázirshe belgisiz.

Apattan keıin ýchaskedegi poıyz qozǵalysy ýaqytsha toqtatyldy. Qalaaralyq poıyzdar basqa vokzaldarǵa baǵyttaldy. Aldyn ala esep boıynsha, materıaldyq shyǵyn keminde 650 myń eýro (shamamen 317,8 mln teńge) bolady.

Chehııanyń kólik mınıstri Ivan Bednarjık poıyzdardyń soqtyǵysý sebepteri tergelip jatqanyn málimdedi.

Eske salaıyq, buǵan deıin Ispanııadaǵy birneshe ondaǵan adamnyń ómirin qıǵan poıyz apatyna ne sebep bolýy múmkin ekenin jazǵan edik.