Pragada pandemııaǵa baılanysty shekteýge narazy top polıtsııa qyzmetkerin jaraqattady

PRAGA. QazAqparat – Senbide Praga ortalyǵynda Chehııada koronavırýsqa baılanysty kúshine engen qatań áleýmettik shekteýlerge qarsy ruqsat etilmegen narazylyq aktsııasy kezinde polıtsııa qyzmetkeri jaraqat aldy. Bul týraly jýrnalısterge respýblıka polıtsııasynyń ókili Vıoleta Sırjıshtova málim etti, dep habarlaıdy QazAqparat TASS agenttigine silteme jasap.

«Bastalǵannan keıin kóp uzamaı taratylǵan Vatslav alańyndaǵy ruqsat etilmegen mıtıngtiń eki qatysýshysy polıtsııa qyzmetkerine shabýyl jasady. Polıtsııa qyzmetkeri jaraqat aldy. Shabýyl jasaǵan er adam men kelinshek ustaldy», - dedi ol.

Sırjıshtova atap ótkendeı, qyzmettik mindetterin oryndap júrgen polıtsııa qyzmetkerine shabýyl jasaǵany úshin olarǵa qylmystyq aıyp taǵylady. Eger sot kináli dep tanyǵan jaǵdaıda, ustalǵandar uzaq merzimge bas bostandyǵynan aıyrylady. Polıtseıdiń alǵan jaraqatynyń sıpaty týraly aqparat joq.