Pragada ótken konferentsııaǵa Senat depýtaty, EQYU-nyń Іs basyndaǵy Tóraǵasynyń Jeke ókili Ádil Ahmetov qatysty
ASTANA. 30 naýryz. QazAqparat - Taıaý kúnderde qoǵamdyq saladaǵy antısemıtızmge qarsy is-qımyl jónindegi Pragada ótken joǵary deńgeıdegi konferentsııaǵa QR Parlament Senatynyń depýtaty, EQYU-nyń Іs basyndaǵy Tóraǵasynyń musylmandarǵa qatysty tózbeýshilik jáne kemsitýshilikpen kúres jónindegi Jeke ókili Ádil Ahmetov qatysty.
Lıtva tóraǵalyq etetin EQYU uıymdastyrǵan sharaǵa Uıymǵa qatysýshy 32 eldiń delegattary, ÚEU jáne halyqaralyq uıymdar ókilderi keldi. Konferentsııanyń kún tártibine qoıylǵan máselelerdi talqylaý barysynda toleranttyqty qamtamasyz etý jáne ilgeriletýdegi, antısemıtızmge qarsy kúrestegi kúsh-jigerdi qoldaýǵa baǵyttalǵan tetikterdi qalyptastyrýdaǵy buqaralyq aqparat quraldarynyń róli atalyp ótildi.
Pikirsaıys barysynda sóz alǵan Á.Ahmetov bul saladaǵy aqparat resýrstarynyń derekter berý tájirıbesi antısemıttik yńǵaıdaǵy sharalardyń jolyn kesýge emes, ony qozdyrýǵa yqpal etetinin atap ótti. Senatordyń aıtýynsha, násilshildik, ksenofobııa, antısemıtızm jáne tózbeýshiliktiń basqa da túrleri bir qubylystyń alýan qyrlary bolyp tabylady. Ol sondaı-aq Holokostqa ákep soqqan antısemıtızmdi zerdeleý toleranttyqty ilgeriletýge jáne tózbeýshiliktiń, násilshildiktiń jáne ksenofobııanyń jolyn kesýge yqpal etetin bilim berýdiń mańyzdy bólikteri bola alatynyn týraly pikirin bildirdi.
