Pragada ótken Dımashtyń kontsertinde 9 jasar qyz tyńdarmandardy tánti qyldy
PRAGA. KAZINFORM — Pragada Dımash Qudaıbergenniń jeke kontserti ótti. Qazaqstandyq ónerpaz Chehııa astanasynda ekinshi ret shoý jasady. Alǵashqy ret «Arnaý» gastroli aıasyndaǵy kontserti 2022 jyly ótse, eki jyldan keıin «Stranger» atty jańa baǵdarlamasy Sportovní hala FORTUNA arenasynda ónerpazdyń jankúıerlerin qaıtadan jınady. Bul týraly DimashNews saıty jazdy.
Kontsertti Perfect Production uıymdastyrdy. DimashNews redaktorlary kompanııa mamandarynan 2022 jáne osy jylǵy bolǵan kontsertter arasyndaǵy kózge anyq baıqalǵan aıyrmashylyqtar týraly surady.
Kontsert uıymdastyrýshylary eki jyl buryn da daıyndyqqa qatysqandaryn aıtty. Bıylǵy jyly kompanııa ártistiń Eýropadaǵy eki kontsertiniń resmı uıymdastyrýshysy retinde ártistiń ózimen jáne «DimashAli» shyǵarmashylyq ortalyǵynyń jetekshisi Qanat Aıtbaevpen tyǵyz jumys jasap jatyr.
«Dımashtyń kontsertteri qarapaıym kontsertterdiń qatarynan emes. Kontsert qyzyqty da kúrdeli shoýlardan turady. Tehnıkalyq qoldaýǵa naǵyz Shoý jasaý úshin kóptegen jaryq jáne dybystyq jabdyqtar, led-ekrandar, jandy mýzykanttar men balet te bar. Múmkin bul meniń tájirıbemdegi eń kúrdeli joba shyǵar», – dep Perfect Production dırektory ıAn Larıonov óz pikirimen bólisti.
ıAn, sonymen qatar, Dears qaýymdastyǵymen tanystyǵy týraly:
«Bir ereksheligi, kontsertke ánshiniń uıymshyl jankúıerleri álemniń túkpir-túkpirinen jınalady. Kontsert qarsańynda qoldaý kórsetýge kelgen ánshiniń jankúıerlerine erekshe toqtalǵym kelip otyr. Olardyń qatarynda, tipti, Avstralııa men Latyn Amerıkasynan da kelgen ókilder bar sııaqty kórindi.Kontsert aldynda kóshede jınalǵan jankúıerlerge qarap, men, tipti, Olımpıada oıyndarynyń ashylýyna tap bolǵandaı boldym. Ár fan-klýbtyń óz kerek-jaraqtary, óz kostıýmderi men túrli-tústi jaryq gammalary bar. Bári jan-jaqty uıymdastyrylyp, daıyndalǵan», – dep óz oıymen bólisti.
2024 jyldyń qyrkúıeginde Astanada ótken kontserttik-shoý baǵdarlamasy Dımashtyń oryndaýyndaǵy Qazaqstan Respýblıkasynyń ánuranymen ashylǵan bolatyn. Sol úrdispen bul keshte de ol ánuran shyrqady, biraq qabyldaýshy eldiń Chehııanyń ánuranynan bastady.
Kontsert barlyq jaǵynan jaqyndastyrdy. Án arasyndaǵy úzilisterde Dımash kórermendermen aǵylshyn, frantsýz, qazaq, orys tilderinde oı bólisip, qytaı tilindegi ánderiniń sol tilde durys aıtylý naqyshyn teksere otyryp, jankúıerlerin birge qosylyp án aıtýǵa shaqyrdy.
Kontsert barysynda Dımash 9 jasar Sofııa esimdi mýzykamen aınalysyp júrgen qyzdy sahnaǵa shaqyrdy. Jas vokalıst esh qınalmastan úlken sahnadan Ýıtnı Hıýston ániniń úzindisin oryndap, kórermenniń qoshemetine bólenip, Dımashtyń ózinen gúl shoǵyn aldy.
Eske sala keteıik, buǵan deıin Majarstannyń premer-mınıstri Dımash týraly post jazǵan bolatyn.
