Pragada kúshti jarylys boldy: 40 adam zardap shekti
ASTANA. 29 sáýir. QazAqparat - Chehııanyń astanasy Pragada kúshti jarylys boldy, dep habarlaıdy RBK.
CTK telearnasy habarlaǵandaı, shamamen 40 adam zardap shekti.
Qolda bar málimetter boıynsha jarylys Praganyń Karlov ýnıversıtetiniń áleýmettaný fakýlteti jáne Chehııa Ulttyq teatrynyń janyndaǵy úıde bolǵan.
Jarylys nátıjesinde ǵımarat qatty zaqymdanǵan. Pragalyq qutqarýshylar tobynyń bastyǵy Zdenek Shvartstyń aıtýyna qaraǵanda, kem degende 40 adam, negizinen ýnıversıtet stýdentteri, jaraqattanǵan. Kópshiliginiń jaraqattary synǵan áınekterdiń kesip ketýine baılanysty oryn alǵan. Tórt adam aýrýhanaǵa jetkizildi, olar aýyr jaraqat alǵan. Ázirge rastalmaǵan málimetter boıynsha, jaraqat alǵandardyń bireýi qaıtys bolǵan.
Polıtsııa búkil aýdandaǵy adamdardy qaýipsiz jerge kóshirdi. Ýnıversıtet basshylyǵy jaqyn kúnderde sabaqtardyń bolmaıtynyn jarııalady. Alǵashqy málimetter boıynsha, tótenshe oqıǵaǵa gazdyń jarylýy sebep bolýy múmkin.
