Poıyzdyń júk sóresine jolaýshy jatqyzǵan jolserikter jazalanatyn boldy
NUR-SULTAN. QazAqparat - «Jolaýshylar tasymaly» AQ áleýmettik jelide taraǵan atyshýly vıdeoǵa qatysty pikir bildirdi, dep habarlaıdy QazAqparat.
Kompanııanyń baspasóz qyzmetiniń habarlaýynsha, beınejazbada kórsetilgen tambýr men júk sóresine jolaýshylar «Mańǵyshlaq - Aqtóbe» baǵytyndaǵy №309/310 jolaýshylar poıyzynda bolǵan. Atalǵan fakt boıynsha, qyzmettik tekserý júrgizilip, aıypty qyzmetkerlermen eńbek shartyn buzýǵa deıingi ákimshilik sharalar qabyldanady.
«Bul oqıǵanyń bizdiń poıyzda bolǵany rastaldy, endi Eńbek kodeksine sáıkes tekserý júrgiziledi. Mundaı vıdeolar kompanııanyń bas dırektorynyń blogyna kelip túsedi jáne biz aıypty qyzmetkerlerge eń qatal jazany qoldanamyz. Ótken jyldyń sáýir aıynda kompanııada zańsyz jolaýshylar maen júk tasymaldaıtyn qyzmetkerlerge «tózbeýshilik» ustanymy engizildi. Bul aralyqta 130 adam jumystan shyǵarylyp, 26 adamnyń laýazymy tómendedi», - dedi «Jolaýshylar tasymaly» AQ Qyzmet kórsetý jáne klıenttermen jumys departamentiniń dırektory Álibek Sultanov.
Sonymen birge, uıym qyzmetkerleri aıyna 500-den astam poıyzdy tekseredi. 2019 jyldyń alǵashqy 5 aıynda kompanııa 2 726 poıyzdy tekserip, 79 bıletsiz jolaýshyny, 1,5 tonna rásimdelmegen júkti tapqan.
«Vıdeo avtoryna belsendi azamattyq ustanymy úshin alǵys bildiremiz jáne turǵyndardy kúmándi qyzmetke júginbeı, aldyn ala bılet salyp alýǵa keńes beremiz. Jyl saıyn Qazaqstanda jazǵy ýaqytta bılet tapshylyǵy bolady. Bıyl da kompanııa jazǵy ýaqytta tutas vagon parkin jumyldyryp, 6 mıllıonnan astam jolaýshy tasymaldaýdy josparlap otyr. Aldaǵy 10 jylda kompanııa jańa 1200 vagon satyp alady», - dedi Á. Sultanov.
Tasymalǵa shaǵymdanǵan jolaýshylar táýlik boıy 1433 baılanys ortalyǵyna nemese áleýmettik jelidegi kompanııa paraqshalaryna júgine alady.
