Poıyzdyń astynda qalyp, eki aıaǵynan aıyrylǵan kelinshekke qatysty týystary túsinik berdi
AQTÓBE. QazAqparat – Aqtóbede 33 jastaǵy Gúljanat Buharbaeva eki aıaǵynan aıyryldy. Kelinshektiń týǵan-týystary oqıǵanyń mán-jaıyn aıtyp berdi, dep habarlaıdy QazAqparat tilshisi.
19 tamyz kúni aqtóbelik kelinshektiń poıyz astynda qalyp, eki aıaǵynan aıyrylǵany týraly jazǵan bolatynbyz. Jansaqtaý bóliminde jatyp, em qabyldaýyn jalǵastyrǵan Gúljanat Buharbaevanyń enesi mán-jaıdy aıtyp berdi.
«Kelinim 1 kún jumys istep, 1 kún demalady. Negizi túngi kezekte turǵan adamdar bir kún jumys istegen soń eki kún demalýy tıis. Gúljanat 18 tamyz kúni keshki saǵat 20:00-de jumysqa kiristi, tańda 8:00-de shyqty. Sodan soń jınalysqa qatysqan. Poıyz júrgen kezde basy aınalyp ketip, qulaǵan. Onyń aldynda, ıaǵnı, tamyz aıynyń basynda sýyq tıip aýyryp, em alyp edi. Sol kúni «sý ishetin de ýaqyt bolmady» dep janyndaǵy áriptesterine aıtqan», - dedi Shalqar qalasynyń turǵyny Aqdári Buharbaeva.
Oqıǵanyń tirkelgenine 7 kún boldy. Gúljanat Buharbaeva esin jıǵanymen týǵan-týystary ótken jaıtty qozǵap, janyn aýyrtpaýdy jón kórgen. Mán-jaıdy qazbalap suraýǵa da qorqady. Aldaǵy ýaqytta naýqas sanavıatsııamen oblys ortalyǵyna jetkizilýi múmkin.
«Kelinim óte jaqsy. Úsh balasy bar. Úlkeni 12, kishisi 6 jasta. Jaqsy, jaıdarly adam týraly túrli qaýeset tarap jatqan soń bul oqıǵanyń oqys jaǵdaı ekenin túsindirgimiz keledi. Temirjol salasynda oqyp, 2011 jyldan beri jumys istep kele jatyr. Jumysyna adal qyzmetkerdiń basyna túsken isti óndiristik jaǵdaı dep qabyldaýyn suraımyz», - dedi Aqdári Buharbaeva.
