Poıyzdardyń soqtyǵysýy múmkin emes - tekserý komıssııasy
ASTANA. QazAqparat - Jambyl oblysynda QR Kólik komıtetiniń tóraǵasy Áset Asabaev pen «QTJ» UK» AQ basqarma tóraǵasy Qanat Alpysbaevtyń qatysýymen 17 maýsymda Astana-Almaty poıyzynyń apatqa ushyraýyna qatysty brıfıng ótti, dep habarlaıdy QazAqparat QR Investıtsııalar jáne damý mınıstrliginiń baspasóz qyzmetine silteme jasap.
Baspasóz málimetterine qaraǵanda, brıfıng barysynda jýrnalısterge osy oqıǵaǵa qatysty qurylǵan komıssııanyń jumysy týraly aıtyldy.
Qazirgi ýaqytta komıssııa jol ýchaskesi ınfraqurylymynyń tehnıkalyq jaǵdaıyn zerttep, jyljymaly quramnyń ınstrýmentaldy ólshemderi júrgiziledi.
Budan bólek, komıssııa jolaýshylar poıyzyna kórshiles jolmen ótip bara jatqan júk quramy bar poıyzdyń júrip ótýin uıymdastyrdy. Eksperıment eki poıyzdyń joldarmen ótý kezinde bir birimen qaqtyǵysý múmkindigin joıdy. Júk poıyzy men jolaýshylar poıyzynyń qaqtyǵysýy ekinshisi joldan shyǵyp ketkennen keıin bolǵan.
Tergeýge qazaqstandyq jáne reseılik mamandar tartyldy.
Olar ǵylymı-tehnıkalyq zertteý men poıyzdyń jaǵdaıyn modeldeıdi. Komıssııa sarapshylardyń jumys nátıjelerin apattyń sebep-saldaryn anyqtaýda eskeretin bolady.
Tergeý nátıjeleri boıynsha tıisti sharalar qoldanylady. Qazirgi ýaqytta Komıtet barlyq temirjol ýchaskelerindegi poıyzdardyń qozǵalys qaýipsizdigin qamtamasyz etýdi qatań baqylaýǵa aldy.
18 maýsym kúni saǵat 14:30-da apat bolǵan jerde jóndeý jáne qalpyna keltirý jumystary bastaldy. Oǵan 9 birlik tehnıka, 300 jumysshy tartyldy. Jumystardy 23:00-ge deıin aıaqtaý josparlanyp otyr. Qozǵalys toqtatylǵan joq, poıyzdar ekinshi jolmen ótip jatyr.
