Poıyzdarda merzimi ótip ketken 100 myń jıyntyq tósek oryn paıdalanylýda
«Jolaýshylar vagondarda, dáretxanalarda, jazda qapyryqpen, las tósek orynmen jáne jalpy sanıtarlyq tártiptiń talapqa saı bolmaýy jaǵdaılarymen jıi kezigip jatady. 280-nen astam vagondy tekserý barysynda 113 vagonnan zııandy bakterııalar men mıkroaǵzalar tabyldy. Bul bylyqtyń basy ǵana. Jalpy bizde SEQ organdarynyń 90-nan astam aktileri bar, onda tazalyq boıynsha 800-den astam zańbuzýshylyqtar anyqtalǵan. Olardyń ishinde tósek oryn máselesi de bar. Búginde poıyzdarda merzimi ótip ketken 100 myńnan astam tósek oryn paıdalanylýda. Tósek oryndy jýý sapasyz júzege asyrylýda. Keıbiri tipti jyrtylǵan. Talapqa sáıkes saqtalmaıdy», - dep atap ótti ol búgin QR Bas prokýratýrasynda kóliktik saladaǵy máselelerdi talqylaýǵa arnalǵan alqa májiliste.
Onyń aıtýynsha, tósek orynǵa qatysty syndy bile tura, tasymaldaýshy tarapynan eshqandaı sharalar qoldanylmaı otyr. Tenderdi texnıkasy men shtaty joq, jańa qurylǵan kompanııalar jeńip ketýde. Kelisimshart sharttaryn oryndamaǵan kompanııalarǵa aıyppul salynbaıdy.
«Taǵy bir jolaýshylardyń shamyna tıetin zańbuzýshylyqtardyń biri - poıyzdarda temperatýra rejımin saqtamaý. Búginde temir joldaǵy vagondardyń 35 paıyzy temperatýralyq rejımdi qamtamasyz ete almaıdy. 153 vagon aýa raıy 32 gradýstan joǵary ysyǵan kezde salqyndatý múmkindigi joq jeldetkishtermen jolaýshylar tasymaldaýda. 112 vagonda ondaı qurylǵy tipti atymen joq. 600 vagonda sýdy salqyndatatyn jabdyqtar qoıylmaǵan», - dep atap ótti A. Amanov.