Poıyzdarda kezdesetin basty kemshilikter qandaı
ASTANA. QazAqparat - Jolaýshy poıyzdaryn kezekti tekserý barysynda tasymaldaýshylarǵa 35 mln teńge aıyppul salyndy, dep habarlaıdy QazAqparat.
Shildeniń 8-i men 22-si aralyǵynda QR IDM Kólik komıtetiniń qyzmetkerleri 8 jolaýshy poıyzyna sýbsıdııalaý sharttary men Ulttyq standart talaptarynyń saqtalýyna qatysty tekserýler júrgizdi.
«Atap aıtqanda, Almaty-Ozınkı, Almaty-Novosibir, Mańǵystaý-Aqtóbe, Mańǵystaý-Atyraý, Almaty-Saryaǵash, Almaty-Jezqazǵan, Almaty-Mańǵystaý jáne Almaty-Qostanaı baǵyttarymen júretin poıyzdar tekserildi. Onyń nátıjesinde, Ulttyq standart talaptaryna qatysty 348 buzýshylyq anyqtaldy. Olardyń ishinde vagondardyń tehnıkalyq jaǵdaıy, terezelerdiń germetıkalyq jaǵdaıyn saqtamaý, tósek oryndarynyń lastyǵy anyqtaldy. Sondaı-aq, dárethana jabdyqtary men basqa da qajetti zattardyń bolmaýy sııaqty kemshilikter bar», - delingen QR IDM málimetinde.
Tekseris qorytyndylary boıynsha tasymaldaýshylarǵa 35 mln teńgeden astam kólemde aıyppul salyndy. Sonymen qatar, jaqyn arada anyqtalǵan kemshilikterdi joıý jóninde tapsyrma berildi.
