Poıyzdar qozǵalysy jandanǵan kezde jolaýshylar asa kóp bolmaıdy - Sádýaqas Baıǵabylov
NUR-SULTAN. QazAqparat – Kóliktegi memlekettik bas sanıtarlyq dáriger Sádýaqas Baıǵabylov 1 maýsymnan poıyzdar qozǵalysy jandanǵan kezde jolaýshylar aıtarlyqtaı kóp bolmaıtynyn aıtty, dep habarlaıdy QazAqparat.
«Áýe tasymalyndaǵy sııaqty osy qyzmetterdi negizinen tótenshe jaǵdaı kezinde qalalarda qalyp qoıǵan jolaýshylar paıdalanady. Sonymen qatar, qyzmettik issaparǵa jiberilgender jolǵa shyǵady. Dál solaı temirjol kóliginde de bolady», - dedi S. Baıǵabylov Ortalyq kommýnıkatsııalar qyzmetinde.
Onyń paıymynsha, temirjol kóligimen tasymaldaý jandanǵandaǵy bastapqy kezeńde jolaýshylar aıtarlyqtaı kóp bolmaýy múmkin.
«Áýe kóligimen tasymaldaýdy monıtorıngileý kezinde turǵyndar ózderiniń densaýlyǵyna jaýapkershilikpen qaraǵanyn baıqadyq. Olar aýrý juqtyrmas úshin barlyq talaptardy qatań ustandy. Temirjol kóligimen saparlaý kezinde de jolaýshylar osy talaptarǵa erekshe mán beredi», - dedi S. Baıǵabylov.
Budan buryn habarlanǵandaı, 2020 jylǵy 1 maýsymnan bastap Memlekettik bas sanıtar dárigerdiń talaptaryn saqtaýdy eskere otyryp, kezeń-kezeńmen ishki temirjol qatynasyn jandandyrý josparlanyp otyr.
