Poıyzda jarty mln teńgege jýyq aqshany urlaǵan qaraǵandylyq ustaldy
ASTANA. QazAqparat - Kólik polıtseıleri «Almaty-Petropavl» baǵytyndaǵy jolaýshylar poıyzynda jarty mıllıonǵa jýyq teńge urlaǵan 40 jastaǵy er adamdy ustady, dep habarlaıdy QazAqparat.
Kóliktegi ІІD baspasóz qyzmetiniń málimetinshe, «Almaty-Petropavl» baǵytyndaǵy jolaýshylar poıyzynda urlyq jasaǵan Qaraǵandy oblysynyń 1978 jylǵy turǵyny anyqtalyp, kúdikti dereý ustalǵan.
«Jolaýshylar poıyzdaryna ilesip júrý batalonynyń qyzmetkerlerine 37 jastaǵy azamat habarlasyp, onyń syrtqy kıiminiń qaltasynan belgisiz bireý 480 myń teńgesin urlap ketkendigi týraly shaǵymdanǵan», delingen habarlamada.
Zattaı aıǵaq retinde aqsha tárkilengen. Kúdikti óz aıybyn tolyqtaı moıyndap otyr. Qazirgi ýaqytta atalǵan derek boıynsha sotqa deıingi tergeý amaldary júrgizilýde.
