Poıyzda zańsyz júk alyp bara jatqan ózbekstandyq jolserikter ustaldy

ASTANA. QazAqparat - Qazaq-ózbek shekarasyndaǵy shekarashylar kontrabandalyq júk pen esirtki zattaryn ótkizýge tyrysqandardyń jolyn kesti. Bul týraly QR UQK ShQ baspasóz qyzmeti habarlady.

«Saryaǵash temirjol» baqylaý-ótkizý beketiniń shekarashylary «Máskeý-Tashkent» baǵytyndaǵy poıyzdyń úsh vagonynan jalpy salmaǵy 43 kılogramm jáne 8 kılogramm bolatyn zańsyz zattardy anyqtady. Onyń birinshisi tamaqqa qosylatyn qospalar bolsa, ekinshisi kosmetıkalyq zattar bolyp shyqty. Atalǵan derek boıynsha úsh jolserik ustaldy. Olar Ózbekstan azamattary.

Osy kúni, qyzmettik ıttiń kómegimen 29 jastaǵy Ózbekstan azamaty ustaldy. Atalǵan azamattyń qoljúkterin qaraý kezinde odan 200 gr bolatyn marıhýana tabyldy.  Onyń temirjolshy bolyp jumys isteıtindigi anyqtaldy.

Sondaı-aq, «Jibek joly avto» baqylaý-ótkizý beketiniń shekara narıady qyzmettik ıttiń kómegimen 53 gr «marıhýana» esirtkisin jasyryp ótkizýge tyrysqan 33 jastaǵy Ózbekstan azamatyn ustady.