Poıyzda pyshaqtalǵan jýrnalıst Esirkepovtiń ómirine qaýip tónip turǵan joq - ІІM
ASTANA. QazAqparat - Jolaýshylar poıyzynda jýrnalıst Ramazan Esirkepovti jaraqattaý faktisi boıynsha QR Qylmystyq kodeksiniń 24 jáne 99 baptarynda kózdelgen qylmys belgilerimen sotqa deıingi tergeý amaldary júrgizilýde. Bul jaıynda QR ІІM Memlekettik til jáne aqparat departamentiniń dırektory Almas Sadýbaev málim etti, dep habarlaıdy QazAqparat.
«Esirkepov pyshaq jaraqatyn alǵandyǵy jaıynda jolserikke tańǵy saǵat 4-te aıtqan. Jolserik bul jaıynda Shý stansasynyń medıtsınalyq beketi men polıtsııaǵa habarlaǵan. Poıyz stansaǵa kelgennen keıin zardap shekken azamat shuǵyl túrde qalalyq aýrýhanaǵa jetkizilip, ota jasaldy. Onyń úsh jerden pyshaq jaraqatyn alǵandyǵy anyqtaldy. Bireýi kókshandyrǵa kirgenimen, ishki aǵzaǵa zaqym keltirmegen. Qazirgi ýaqytta onyń ómirine esh qaýip tónip turǵan joq», - dedi ol.
Onyń sózine qaraǵanda, atalǵan qylmysty ashý úshin ІІM men kóliktegi ishki ister departamentiniń tájirıbeli qyzmetkerlerinen jasaqtalǵan jedel tergeý toby qurylǵan.
«Poıyzdyń jolserikterin, jolaýshylardy tergeý jáne qylmyskerdi anyqtaýǵa baǵyttalǵan basqa da jedel tergeý sharalary júrgizilýde. Bul isti Іshki ister mınıstrligi baqylaýyna aldy», - dedi Sadýbaev.
