Poıyzda mas bolyp, jolaýshylardyń mazasyn alǵan 4 adam qamaýǵa alyndy
ASTANA. QazAqparat - Kólik polıtseıleri alkogoldi ishimdik ishken tórt er adamdy Almaty - Saratov baǵytyndaǵy poıyzda orta joldan túsirip aldy, dep habarlaıdy QazAqparat tilshisi Kóliktegi polıtsııa departamentiniń baspasóz qyzmetine silteme jasap.
QR ІІM Kóliktegi polıtsııa departamentiniń qyzmetkerleri Almaty-Saratov baǵytyndaǵy jolaýshylar poıyzynan qoǵamdyq tártipti buzǵan tórt er adamdy alyp qalǵan. Olar Aqmola jáne Batys Qazaqstan oblysynyń turǵyndary bolyp shyqqan.
«Tekserý kezinde anyqtalǵandaı, quqyq buzýshylar mas kúıinshe ádepsizdik kórsetip, bylapyt sózder aıtqan. Jasalǵan eskertýdi elemeı jolaýshylardyń mazasyn alǵan. Medıtsınalyq kýálandyrý qorytyndysyna sáıkes, olar «ortasha deńgeıde» mas bolyp shyqty», - delingen habarlamada.
Ustalǵandardyń ústinen eki ákimshilik hattama toltyryldy. Quqyq buzýshylar usaq buzaqylyǵy men qoǵamdyq orynda ishimdik ishkeni úshin ákimshilik jaýapkershilikke tartyldy. QR Ákimshilik quqyqbuzýshylyq týraly kodekske sáıkes, olardyń árqaısynyna 5 AEK (12 625 teńge) kóleminde aıyppul salyndy. Sonymen qatar, Túrkistan qalasynyń mamandandyrylǵan sotynyń sheshimimen olar ákimshilik qamaýǵa alyndy.
Kóliktegi polıtsııa departamenti jyl basynan beri áýe jáne temirjol nysandarynda 5142 quqyqbuzýshyny ákimshilik jaýapkershilikke tartqan. Olardyń ishinde 590-y qoǵamdyq oryndarda ishimdik iship, kózge túsken.
