Poıyzda bosanǵan áıel sábıiniń esimin dárigerdiń qurmetine atady
ALMATY. QazAqparat -«Mańǵyshlaq-Almaty» poıyzynda bosanǵan áıel perzenthanadan shyǵaryldy, dep habarlaıdy QazAqparat tilshisi.
Sajıda Málikovany Shymkentten kelgen týystary búgin perzenthanadan shyǵaryp alýǵa keldi.
«Balamyz tuńǵysh qyzyn kórýge kele almady. Ol áskerı bólimde qyzmet isteıdi. Kelinimdi júkti kezinde baqylaýyna alǵan dárigerdiń qurmetine nemeremdi Saıda dep atadyq. Sajıdaǵa nárestesin dúnıege ákelýine kómektesken poıyz qyzmetkerleri men medıtsınalyq jumysshylarǵa alǵysymdy bidiremin. Onyń bul kezeńdi qıyndyqsyz ótkizgeni bárimizdi qýantady», - dedi Sajıdanyń enesi Gúljamal Shábilova.
Almatydaǵy №4 perzenthana dárigerleriniń aıtýynsha, jas anaǵa barlyq medıtsınalyq kómek kórsetilgen.
«22 jastaǵy Sajıda sábıin «Mańǵyshlaq-Almaty» poıyzynda bosandy. Shymkenttik dárigerler baýyry men búıreginiń kórsetkishi boıynsha Sajıdany Ana men balany ortalyǵyna jibergen. Bosanatyn ýaqyt 15 shildege belgilengen eken. Uzaq joldyń áserinen bolýy kerek, tolǵaq bastalǵan. Ony jedel túrde bizge jetkizdi. Qyzdyń deni saý, aýytqýshylyqtar baıqalǵan joq. Anasynyń jaǵdaıy da birqalypty», - dedi perzenthananyń bas dárigeri Zııada Donbaeva.
Sajıda Málikova perzenthanadan shyqqannan keıin turǵylyqty jeri Shymkentke jol tartty. Eske salaıyq, Sajıda 9 shilde kúni № 378 «Mańǵyshlaq-Almaty» poıyzynda bosanyp qalǵan bolatyn.
Poıyz Shamalǵan stansasynan jolǵa shyqqan soń áıeldi tolǵaǵy qysa bastaǵan. Poıyz bastyǵy Almaty-1 stansasyna jedel járdem qyzmetin shaqyrǵan. Qyz balanyń dúnıege kelýine eki jolserik pen jolaýshy áıel kómektesken.
