Poıyzda án salǵan jolserik Aqylzat Seıtjapar Tiktok juldyzyna aınaldy
ASTANA. QazAqparat – Taıaýda áleýmettik jelilerde talantty jolseriktiń poıyz jolaýshylarymen birge sheber án shyrqap jatqan vıdeosy tarady. Bul rolık áp sátte Tiktok-ta kóp qaralym jınap, tanymal boldy. Osy oraıda, QazAqparat tilshisi tamyljyta án salǵan jolserikpen áńgimelesip kórdi.
Keıipkerimiz Aqylzat Seıtjapar ómirde túrli jumystardy josparlaǵanmen, taǵdyr óz degenin jasaıdy dep sanaıdy. Onyń paıymynsha, ár adam sheshimderiniń qaısysy asa zor mańyzǵa ıe bolatynyn jáne onyń bolashaqqa qanshalyqty áser etetinin bilmeıdi.
«Men shýaqty Taraz qalasynyń týmasymyn. 2006 jyldan bastap Astanadamyn. 13 jyl boıy «Qazaqstan temir joly» kompanııasynda jumys istep kelemin. Bir ulym, bir qyzym bar. Aıta keteıin, ulym meniń jolymdy qýyp, óziniń mamandyǵyn temir jol salasymen baılanystyrdy», - dep óz áńgimesin bastady Aqylzat Seıtjapar.
Onyń án ónerine degen qyzyǵýshylyǵy men súıispenshiligi bala kúnnen bastalǵan.
«Men bala kezimnen ánge ǵashyqpyn. Mektep jyldarynda kúzgi balǵa, túrli baıqaýlarǵa qatysatynmyn. Meniń armanym – ol ánshi bolý jáne úlken sahnalardy baǵyndyrý edi. Sol kezdegi eń aýqymdy SuperStar jobasyna qatysqym keldi. Degenmen ol ýaqyttarda qarjylyq qıyndyqtar boldy. Keıin men temirjolshy mamandyǵyn tańdadym. Jolseriktiń kıimin alǵash kıip kórgen sátim áli esimde. Bul - umytylmas sezim», - dep bólisti Aqylzat Seıtjapar.
Áleýmettik jelilerde taraǵan tanymal vıdeo «Shymkent-Astana» baǵytynda qatynaıtyn poıyzda túsirilgen.
«Bizdiń vagonda Astanada ótetin mýzykalyq konkýrsqa qatysýǵa bara jatqan stýdentter boldy. Olar birge otyryp án aıtty, mýzykalyq aspaptarda oınady. Jastarǵa qoldaý kórsetý úshin men de qosyla án shyrqadym. Biraq, sol sátte meni vıdeoǵa túsirip jatqanyn baıqamadym. Men tipti áleýmettik jelini, onyń ishinde Tiktok-ty qalaı qoldaný kerektigin bilmeımin. Kelesi kúni tańerteń maǵan aǵam qońyraý shalyp, men óleń aıtqan vıdeonyń tanymal bolǵanyn aıtty. Qatty tańǵaldym, sál qorqynysh ta boldy. Ony jasyrmaımyn. Óıtkeni, biz jumysta jolseriktiń formasymen júremiz. Keıin maǵan bastyqtar habarlasa bastady. Men sógis alatyn shyǵarmyn dep oıladym. Alaıda, olar kerisinshe, maǵan qoldaý kórsetip, jyly lebizin bildirip jatty. Men bir kúnde osyndaı aýqymda tanymal bolyp shyǵa kelemin dep eshqashan oılamappyn», - dep sol sátti esine aldy Aqylzat Seıtjapar.
Keıipkerimizdiń sózinshe, oǵan alǵashynda týystary habarlasyp, vıdeoǵa qatysty pikir bildirip, quttyqtaı bastapty.
«Maǵan bárinen buryn qýanyshtan kózine jas alǵan ata-anamnyń reaktsııasy unady. Shamamen bir jyldan astam ýaqyt buryn ákemniń densaýlyǵy syr berip, ol tósekke tańyldy. Onyń qýanǵannan jylaǵanyn kórgen kezdegi sezimimdi aıtyp jetkize almaımyn. Óıtkeni, men bala kezimnen ánshi bolamyn dep aıtatynmyn. Meniń áriptesterim án shyrqaıtynymdy múldem bilmeıdi de. Bul vıdeony kórgende, olar qatty tańǵaldy. Tipti, olardyń tarapynan usynys ta aıtyldy. Men olarǵa kásibı ánshi emes ekenimdi jetkizip, usynystarynan bas tarttym», - deıdi án salyp, jelide tanymal bolǵan jolserik.
Aqylzat Seıtjapardyń aıtýynsha, onyń án ónerine qyzyǵýshylyǵyn ashqan, oǵan sebepker bolǵan - ákesi men atasy.
«Men qazir sahnada án aıtýdy armandamaımyn. Óıtkeni, ol - meniń bala kúngi qııalym. Al qazir ómirimniń máni men josparlarym ózgerdi. Degenmen, balalyq shaqtaǵy sol arman oı túbinde qalady eken. Keıde ókinish te bolady. Eseıgen saıyn, adam sanaly saraptap, júıeli oılaı bastaıdy. Al bala kezde túrli oıǵa qııal bitiresiń. Ol sátte múmkin emes eshteńe joq sııaqty kórinedi. Meniń balalarym án salǵandy unatady dep kesip aıta almaımyn. Degenmen, olar shyǵarmashylyq mamandyqtardyń birin tańdaǵysy kelse, men mindetti túrde qoldaý kórsetemin. Keıde balalarym meniń oryndalmaı qalǵan armanymdy júzege asyrýy yqtımal degen de oı mazalaıdy. Bul - ómir, al onda barlyǵy múmkin», - deıdi Aqylzat Seıtjapar.
Jolserik atap ótkendeı, mýzykada shekara joq. Ol ómirdiń barlyq salalaryna enedi jáne jan dúnıege tereń boılap, júrek qylyn shertedi.
«Maǵan ataqty kompozıtor Shámshi Qaldaıaqovtyń ánderin oryndaǵan unaıdy. Meniń oıymsha, ol týyndylar shynaıy, óte sezimtal, júrekten júrekke jetedi. Mýzyka keıde adamdy ótken sátke jeteleıtin ýaqyt mashınasy sııaqty. Kásibı maman bolmasam da, kún saıyn án shyrqaımyn. Men adamdarǵa mynany aıtqym keledi: armanyńyzdy oryndaý úshin sońyna deıin barýyńyz kerek. Eger siz olardy júzege asyrmaı, orta joldan toqtasańyz, onda siz sana túbinde qalatyn ókinishpen ómir súresiz. Eger óz armanyńyzǵa qol jetkizseńiz, ózgeler sizge qarap, jigerlenedi. Árbir arman úshin kúresý qajet dep esepteımin», - dep sózin túıindedi Aqylzat Seıtjapar.
