Poıyzben Astanaǵa 36 keli esirtki jetkizgen áıel ustaldy
ASTANA. QazAqparat -Elordada 36 keliden astam esirtki zatyn tasymaldaǵan áıelge sot úkimi shyqty, dep habarlaıdy QazAqparat Astana qalasy sotynyń baspasóz qyzmetine silteme jasap.
Іs materıaldaryna sáıkes, azamatsha A. ózge adammen aldyn ala kelise otyryp, Shý qalasynan Astanaǵa jolaýshylar poıyzymen eki jol sómkesimen esirtki zaty - gashıshti tasymaldaǵan. Onyń jalpy salmaǵy - 36 keli 188 gramm bolǵan.
«Astana qalasyna kelisimen temirjol vokzalynda ony azamat M. kútip alyp, ymdaý arqyly sońynan erýge buıyrǵan. Odan ári azamatsha A. azamat M.-niń artynan erip, úılerdiń biriniń aýlasyna keledi. Ol jerde esirtki zattary bar eki sómke azamat B.-nyń kóligine tıelgen. Sómkelerde ne barynan habarsyz kólik júrgizýshisi olardy alyp úıine attanady. Sol jerden Astana qalasy boıynsha UQKD qyzmetkerleri iri kólemdegi esirtki zattary ornalasqan eki sómkeni taýyp, tárkiledi», - delingen sottyń habarlamasynda.
Astana qalasynyń qylmystyq ister jónindegi mamandandyrylǵan aýdanaralyq soty áıeldi QR QK-iniń 297-baby 3-bóligi, 1,3-tarmaǵy boıynsha kináli dep tanyp, oǵan 10 jyl bas bostandyǵynan aıyrý jazasyn taǵaıyndady.
Úkim zańdy kúshine endi.
