Poıyz jolserigine aqsha tólep, Reseıge esirtki alyp ótpek bolǵan Qyrǵyzstan azamaty 15 jylǵa bas bostandyǵynan aıyryldy

Bul oqıǵa jóninde búgin jýrnalıstermen bolǵan brıfıngte Joǵarǵy sottyń resmı ókili Oksana Peters aıtyp berdi.

Resmı ókildiń aıtýynsha, Qylmystyq is materıaldary boıynsha J.ıÝnýsalıev atty Qyrǵyzstan azamaty Qazaqstan aýmaǵynan ótetin «Bishkek-Máskeý» baǵytyndaǵy jolserigine ishine esirtki jasyrylǵan sómkeni berip, Reseı astanasyna deıin jetkizýge qolǵabys etýdi suraıdy. Bul eńbek úshin jolaýshy jolserikke 6 myń qyrǵyz somyn tóleıtin bolady.

«Osy poıyzdy Jambyl oblysynyń Merki stansasynda teksergen shekarashylar odan 2 keli 190 gramm gashısh tabady. Sondaı-aq shekarashylar poıyzdyń vagonynan reseıge ketip bara jatqan azamatty da ustaıdy. Eki keliden astam gashısh iri kólemdegi esirtki bolǵandyqtan, ony tasymaldaýshy J.ıÝnýsalıev 15 jyl 6 aıǵa bas bostandyǵynan aıyryldy. Qylmysker jazasyn qatań tártiptegi kolonııada óteıtin bolady», - dedi resmı ókil.