Poıyz qozǵalysyn jandandyrý: Kóliktegi bas sanıtarlyq dáriger negizgi talaptardy atady
NUR-SULTAN. QazAqparat – Kóliktegi memlekettik bas sanıtarlyq dáriger Sádýaqas Baıǵabylov 1 maýsymnan elimizde kezeń-kezeńmen ishki temirjol qatynasyn jandandyrý sharalaryna qatysty túsinik berdi, dep habarlaıdy QazAqparat.
«Tıisti qaýlyda temirjol vokzaldarynyń basshylyǵy, tasymaldaýshylar men jolaýshy tasymaldaýda qyzmet kórsetetin uıymdar qamtamasyz etýi tıis basty sharalar aıqyndaldy. Onyń ishindegi negizgilerine toqtalsaq, vokzal ǵımaratyna kirer aldynda jolaýshylarda medıtsınalyq maska men jol júrý bıleti bolýy kerek. Sonymen qatar, ǵımaratqa kirer kezde vokzaldyń ózindik qaýipsizdik qyzmeti termometrııa júrgizetin bolady», - dedi S. Baıǵabylov Ortalyq kommýnıkatsııalar qyzmetinde.
Onyń sózine qaraǵanda, temirjol vokzaldary jumysyn jandandyrý men vagondardyń qozǵalysyn qamtamasyz etý aldynda kondıtsıonerleý júıesi tolyq tekserilip, fıltrler aýystyrylady.
«Poıyzdarda dezınfektsııalyq rejımdi kúsheıtý mańyzdy talaptardyń biri bolady. Munymen qosa, poıyz brıgadalary, qyzmetkerler maskamen júrýi kerek. Vagondar arasynda jolaýshylardyń qozǵalysyna shekteý engiziledi», - dedi ol.
Belgili bolǵandaı, jolaýshylardy shyǵaryp salýǵa birge ilesip kelgen adamdar vokzal ǵımaratyna kirgizilmeıdi.
Budan buryn habarlanǵandaı, 2020 jylǵy 1 maýsymnan bastap Memlekettik bas sanıtar dárigerdiń talaptaryn saqtaýdy eskere otyryp, kezeń-kezeńmen ishki temirjol qatynasyn jandandyrý josparlanyp otyr.
