Poıyz bıletteriniń tapshylyǵy: Depýtattar alypsatarlardyń paıdasyn sanap shyqty
ASTANA. QazAqparat - Parlament Májilisiniń depýtattary Astanadaǵy temirjol vokzalynyń jumysyn synǵa aldy. "Aýyl" partııasynyń ókili Farıd Aqberdıevtiń aıtýynsha, poıyz bıletteriniń tapshylyǵy qoldan jasalyp otyr, dep xabarlaıdy QazAqparat tilshisi.
"Máselen, Astananyń temirjol vokzalyna baryp kórińizshi. 14 kassanyń ekeýi ǵana istep turady. Tańerteń kelseń, bıletti keshke qaraı alasyń. Sebebi olar barlyq kassalardy jekemenshik kompanııalarǵa berip tastaǵan", - dedi F.Aqberdıev ekonomıkalyq reforma jáne óńirlik damý komıtetiniń otyrysynda.
Depýtat alypsatarlardyń paıdasyn da sanap shyqty. Onyń sózine qaraǵanda, búginde jekemenshik kassada komıssııanyń kólemi 700 teńgeni qurap otyr. Úsh adam bir jaqqa bılet alsa, 2100 teńgeni tóleý kerek. Oǵan qosa, qaıtatyn bıletterdiń komıssııasy taǵy bar. "Sonda úsh adam baryp kelgenge 4200 teńgeniń komıssııasyn tóleıdi. Al ol aqshanyń bári kimniń qaltasyna ketip jatyr? Qazir ǵalamtordy ashyp qarasańyz, Qazaqstan boıynsha 4 000 jekemenshik kassa bar eken. Sonyń 208-i ǵana "Jolaýshylar tasymaly" AQ-syna tıesili. Demek, jekemenshik kassalardyń 4,6 protsenti ǵana bıletti komıssııasyz satady. Bul ne ózi? Sonda xalyqty kim oılaıdy? Álde, bıznestiń jaǵdaıyn jasap, júre beremiz be?", - dep atap kórsetti F.Aqberdıev.
Aıta keteıik, Parlament Májilisiniń depýtattary kólik máseleleri boıynsha keıbir zańnamalyq ózgeristerdi talqylaýǵa kiristi. Sonyń ishinde respýblıkalyq joldarda kólik quraldaryn jappaı toqtatý tájirıbesine tyıym salý máselesi de bar. Budan bólek, Uber, InDriver men ıAndeks Taksı sııaqty mobıldi qosymshalar boıynsha adam tasıtyn kólik júrgizýshilerin zańdastyrý sharalary qolǵa alynady.
