Poıyz bıletiniń aqshasyn qaıtarýdy qalaı rásimdeý kerek

NUR-SULTAN. QazAqparat – Jolaýshylardan bıletin qaıtarý Indýstrııa jáne ınfraqurylymdyq damý mınıstriniń 2015 jylǵy 30 sáýirdegi buıryǵymen bekitilgen «Temir jol kóligimen jolaýshylar, bagaj, júkbagaj ben pochta jóneltilimderin tasymaldaý» erejesine sáıkes júrgiziledi, dep habarlaıdy QazAqparat «Jolaýshylar tasymaly» kompanııasyna silteme jasap.

Osy erejege sáıkes jol júrý qujaty (bılet):

- poıyz jóneltilgenge deıin 24 saǵattan keshikpeı qaıtarylsa, jol júrý quny tolyq tólenedi;

- poıyzdyń jóneltilýine 24 saǵattan az ýaqyt qalǵanda, biraq poıyz jóneltilgenge deıin 6 saǵattan keshikpeı qaıtarylsa, bılet quny jáne platskart qunynyń 50% tólenedi;

- poıyzdyń jóneltilýine 6 saǵattan az ýaqyt qalǵanda jáne poıyz jóneltilgennen keıin 1 saǵattan aspaı qaıtarylsa, bılet quny tólenip, platskarttyń barlyq quny ustap qalynady, biraq ol jol júrý qunynyń 30%-nan aspaýy tıis.

Poıyz jóneltilgennen keıin 1 saǵat ótken soń jol júrý qujattary (bıletter) da, aqsha qarajaty da qaıtarylmaıdy.

Bılettiń aqshasy bıletti qaıtarý tártibi men satyp alý tásiline baılanysty qolma-qol aqshamen jáne qolma-qol aqshasyz esep aıyrysý arqyly qaıtarylady.

Aıta keterligi, tótenshe jaǵdaı rejımi kezinde koronavırýs pandemııasyna baılanysty temir jol bıletteriniń aqshasyn ustap qalmaı, aıyppulsyz tolyq kólemde qaıtarý týraly sheshim qabyldandy.

16 naýryz ben 11 mamyr aralyǵynda satyp alynǵan temirjol bıletin jolaýshy 6 aı ishinde qaıtara alady.

Bıletin qaıtarý úshin «Jolaýshylar tasymaly» aktsıonerlik qoǵamynyń bılet kassalaryna júgingen jolaýshylar ótinish jazyp, oǵan jol júrý qujatyn (bıletin) jáne jeke basyn kýálandyratyn qujatynyń kóshirmesin qosa berýi qajet.

Sondaı-aq qujattardy «Jolaýshylar tasymaly» aktsıonerlik qoǵamynyń myna aımaqtyq fılıaldarynyń bireýine jiberýge bolady:

1) «Soltústik» aımaqtyq fılıaly (Nur-Sultan q., Gete k-si, 11/1);

2) «Ońtústik» aımaqtyq fılıaly (Almaty q., Tobaıaqov k-si, 2/1);

3) «Batys» AF (Aqtóbe q., Stantsııa k-si,11).

Tıesili aqsha qarajatyn alý úshin topqa alynǵan jol júrý qujattaryn (bıletter) qaıtarý týraly ótinish «Jolaýshylar tasymaly» aktsıonerlik qoǵamyna jiberiledi. Mekenjaı: Nur-Sultan qalasyndaǵy Qonaev kóshesi 6-úı.