Poıyz bıletin qaıtarý úshin komıssııa 1000 teńgege deıin ósti
ASTANA. QazAqparat - 19 maýsymnan bastap bıletterdi qaıtarý úshin komıssııalyq alymnyń jańa mólsheri engizildi, dep habarlaıdy QazAqparat «Jolaýshylar tasymaly» AQ-na silteme jasap.
«Kompanııa 2018 jyldyń 19 maýsymynan bastap jol júrý qujattaryn (bıletter) qaıtarý úshin komıssııalyq alym mólsherin qosylǵan qun salyǵyn qosa eseptegende, 1000 teńgege deıin ósirgenin habarlaıdy. Bul shara jolaýshylardyń qıturqy áreketterge jol bermeý, kiristerdi joǵaltý qaýpin azaıtý jáne tutastaı alǵanda qoǵamnyń tabystylyǵyn arttyrý maqsatynda qabyldandy», - delingen habarlamada.
Komıssııalyq alym kompanııa qurylymyndaǵy barlyq poıyzdarǵa jáne basqa da temirjol ákimshilikterine qoıylǵan. Sondaı-aq, «Jolaýshylar tasymaly» AQ-da qaıtarylatyn bılet quny 1000 teńgeden az bolsa, komıssııalyq alym ustalmaıdy.
