Poıyz bıletin alypsatarlarǵa qarsy kúrestiń jańa tásili engiziledi

NUR-SULTAN. QazAqparat – Elimizde poıyz bıletterin alypsatarlardyń jolyn kesýdiń jańa tásili bar. Bul týraly «Jolaýshylar tasymaly» AQ bas dırektorynyń orynbasary Vıktor Boshmann málim etti, dep habarlaıdy QazAqparat tilshisi.

«Bizdiń júıe poıyz bıletin qaıta sata almaıtyndaı etip jańasha jasaqtaldy. Endigi ýaqytta poıyzǵa bılet satyp alar kezde jolaýshynyń aty-jóni men JSN-i suralady eger ol kisi óz bıletin basqa bireýge satqysy kelse ol júıeden avtomatty túrde joıylyp ketedi de bılet qaıtadan satylymǵa qoıylady. Demek bir adam satyp alyp ekinshi adamǵa bere almaıdy. Poıyz bıletin satý bazasynda bir ǵana adamnyń jeke málimeti bolýy kerek. Satyp alǵan adamnyń aty-jóni men jeke málimetteri bazada avtomatty túrde saqtalyp qalady jáne ol poıyzǵa miner kezde tekseriletin bolady», - dedi Vıktor Boshmann.

Sondaı-aq, atalǵan uıym ókili alypsatarlyq áreket zań aıasynda jaýapkershilikke tartylatynyn eske saldy.

«Ótken jyldyń qańtar aıynan bastap poıyz bıletterin alyp, qaıta satqany úshin ákimshilik jaýapkershiliktiń qatańdatylǵanyn eske salǵymyz keledi. Ol úshin aıyppul kólemi 100-den 500 AEK-ke deıin ósti. Eger azamattar bıletti zańsyz satý faktisine kýá bolǵan jaǵdaıda ol týraly quqyq qorǵaý oryndaryna habarlaýyn suraımyz», - deıdi ol.

Buǵan deıin bıyl Alakólge qatynaıtyn poıyz baǵyttary men onyń baǵasy týraly habarlaǵan bolatynbyz.