Poıyz ben avtobýstyń soqtyǵysýy: úsh adam jansaqtaý bóliminde jatyr
TALDYQORǴAN.QazAqparat – Almaty oblysyndaǵy Shamalǵan stantsııasynda bolǵan avtobýs pen poıyzdyń soqtyǵysýy saldarynan bir adam mert bolyp, 3 adam jansaqtaý bóliminde jatyr, dep habarlaıdy QazAqparat tilshisi.
«9 jedel járdem kóligi 15 mınýtta oqıǵa ornyna jetti. 1979 jylǵy azamat oqıǵa ornynda kóz jumǵan. Al taǵy úsh adam túrli dene jaraqatymen Qarasaı aýdandyq aýrýhanasyna jetkizildi. Onyń ekeýi bala, bireýi áıel adam. Úsheýi de jansaqtaý bóliminde jatyr», dedi Almaty oblystyq densaýlyq saqtaý basqarmasynyń baspasóz hatshysy Láılim Áýbákirova.
Esterińizge sala keteıik, búgin 19:30 mınýtta Shamalǵan stantsııasynda poıyz ben avtobýs soqtyǵysty. Aldyn ala boljam boıynsha, avtobýs temir joldyń relsine shyǵyp ketken. Oqıǵa ornynda avtobýs júrgizýshisi mert boldy. Taǵy úsh adam túrli dene jaraqatymen aýrýhanaǵa jetkizildi.
QR Prezıdenti Qasym-Jomart Toqaev Aqseńgir-Shamalǵan temirjol ótkelinde poezd ben avtobýs soqtyǵysynan japa shekkenderdiń týǵan-týystaryna kóńil aıtty.
