Poıyz apatyn qalpyna keltirý jumystary aıaqtaldy
ALMATY. QazAqparat - Jambyl oblysynda bolǵan poıyz apatynyń saldary tolyǵymen qalpyna keltirildi. Bul týraly Almaty óńirlik kommýnıkatsııalar qyzmetindegi baspasóz konferentsııasy barysynda QTJ-júk tasymaly» AQ Almaty qalalyq fılıalynyń dırektory Sársebek Japarov aıtty, dep habarlaıdy QazAqparat tilshisi.
«Apatty qalpyna keltirý jumystary tolyǵymen aıaqtaldy. Keshe sońǵy úsh vagondy jınaý bastaldy. Almatyda 400 jolaýshyǵa der kezinde kómek kórsetildi. «Qazaqstan Temir joly» AQ ókilderi japa shekken adamdarǵa ótemaqy tóleıtin boldy. Zardap shekkender áýrege túspes úshin arnaıy kartalaryna jiberetin bolamyz. Soma ártúrli. Alǵan jaraqatyna baılanysty 500-900 myń teńgeden keledi. Qaza bolǵan balanyń otbasyna 2,1 mln teńge bólindi. Jaraqat alǵan 24 adamǵa qarjy qalaı bólinedi, solaı jiberemiz», - dedi Japarov.
Onyń aıtýynsha, ázirge jol apatynyń sebebi anyqtalmaı jatyr.
«Bir tujyrymdama aıtý qıyn. Birinshi sebep retinde joldardyń qısaıý degen nusqa talqylandy. Osy sebepti anyqtaý úshin komıssııa quryldy. Biraq, olaı bolǵan bolsa, sonsha kóp vagon relsten shyqpaýy kerek edi. Bul jaǵdaıda 7 vagon ótip ketse, qalǵany relsten shyǵyp ketti», - dedi spıker.
Qazir atalǵan jol apatynyń sebebin zertteý maqsatynda birqatar saraptama taǵaıyndaldy.
«Máskeý jáne Almaty temir jol ınstıtýttarynan 10 maman tótenshe jaǵdaı sebepterin zerttep jatyr. Qorytyndyny solar aıtady. Vagondar jańa. Soqqy bolý yqtımaldyǵyna saraptama jasaldy. Bul múmkin emes degen resmı jaýap berildi», - dedi Sársebek Japarov.
Buǵan deıin Astanadan Almatyǵa bara jatqan jolaýshylar poıyzynyń apatqa ushyraǵanyn habarlaǵan bolatynbyz.
Odan keıin «Qazaqstan temir joly» ulttyq kompanııasy «Astana-Almaty» baǵytynda qatynaıtyn poıyzdyń apatqa ushyraýyna qatysty resmı málimdeme jasap, oqıǵanyń shyǵý sebebin tekseretin arnaıy komıssııa qurylǵanyn jarııa etken edi.
