Poıyz apaty: Zardap shekken jolaýshylarǵa saqtandyrý kompanııasy ótemaqy tóleıdi
ASTANA. QazAqparat - Jambyl oblysy aýmaǵynda apatqa ushyraǵan poıyzdyń zardap shekken jolaýshylaryna ótemaqy tólenedi. Bul jaıynda «Jolaýshylar tasymaly» AQ baspasóz qyzmetinen málim etti, dep habarlaıdy QazAqparat tilshisi.
Taratylǵan málimetke sáıkes, 2017 jyldyń qazan aıynda «Jolaýshylar tasymaly» AQ men «Munaı saqtandyrý kompanııasy» AQ arasynda jolaýshylar aldyndaǵy tasymaldaýshynyń azamattyq-quqyqtyq jaýapkershiligin mindetti saqtandyrý týraly kelisimshart jasalǵan. Joǵary atalǵan kelisimsharttyń shartyna sáıkes kompanııa saqtandyrý jaǵdaıy týyndaǵan kezde jolaýshylarǵa saqtandyrý tólemin júzege asyrýǵa mindetti.
«2018 jyldyń 17 maýsymynda Saryshaǵan-Shý ýchaskesiniń Jıdeli-Birlik ótkelinde «Astana NJ-Almaty-1» baǵytynda qatynaıtyn №9 jolaýshylar poıyzynyń 8 vagony joldan shyǵyp ketti. Qazirgi ýaqytta qoǵam saqtandyrý kompanııasyna sáıkesinshe aqparatty jiberý jumystaryn júrgizip jatyr. Osyǵan baılanysty eger Sizdiń densaýlyǵyńyzǵa nemese múlkińizge zalal kelgen bolsa, onda Siz kelisimshart sharttarynda kórsetilgen saqtandyrý tólemderin alý úshin kompanııaǵa júginýge quqylysyz. Saqtandyrý tólemin alý úshin siz «Munaı saqtandyrý kompanııasy» aktsıonerlik qoǵamyna júginýińiz qajet. Fılıaldarynyń mekenjaıy men ózge de baılanystardy kompanııanyń https://nsk.kz resmı saıtynan bile alasyzdar», - delingen kompanııa aqparatynda.
