Poıyz apaty: Almatyǵa jetkizilgen naýqastardyń jaǵdaıy belgili boldy
ALMATY. QazAqparat - Almaty qalalyq Densaýlyq saqtaý basqarmasy poıyz apatynan japa shekken 8 adamnyń densaýlyǵy jaıly aıtyp berdi, dep habarlaıdy QazAqparat tilshisi.
Keshe 8 jolaýshy Almaty-1 temirjol vokzalynan Almatydaǵy №4 aýrýhanaǵa jetkizilgen bolatyn.
Olardyń barlyǵy jumsaq tin, shúıde, kókirek qýysy, jambas-urshyq býyny, jilinshik, bas jaraqatymen túsken.
Qalalyq emhanada naýqastardy tekserý úshin barlyq mamandardyń qatysýymen mýltıdıstsıplınarlyq komanda quryldy.
Tekserýdiń nátıjesinde barlyq patsıent ambýlatorııalyq em qabyldaýǵa úılerine qaıtaryldy.
Eske sala ketsek, Astanadan Almatyǵa bara jatqan jolaýshylar poıyzy apatqa ushyraǵan bolatyn.
Sál keıin «Qazaqstan temir joly» ulttyq kompanııasy «Astana-Almaty» baǵytynda qatynaıtyn poıyzdyń apatqa ushyraýyna qatysty resmı málimdeme jasap, oqıǵanyń sebebin tekseretin arnaıy komıssııa qurylǵanyn jarııa etken edi.
