Poıyz 21 bas qoıdy basyp ketti - Qaraǵandy oblysy
QARǴANDY OBLYSY. QazAqparat - Qaraǵandy oblysynda poıyz 21 bas qoıdy basyp ketti, dep habarlaıdy QazAqparat.
«Azamattardyń beıqamdyǵy jáne úı maldaryn temirjol bóligine jiberýi ózekti máselelerdiń biri bolyp otyr. Temirjol asa qaýipti aýmaq bolyp sanalady, bul jóninde kólik polıtseıleri únemi eskertip otyrady», - dedi Kóliktegi polıtsııa departamenti bastyǵynyń orynbasary Nurjan Alıbaev.
Onyń aıtýynsha, poıyzdyń maldy basyp ketýi saldarynan jyljymaly quramnyń relsten shyǵyp ketýine, adamdar jaraqaty sııaqty aýyr jaǵdaılarǵa ákep soqtyrýy múmkin.
Bıyl 17 maýsymda «Novaly – Saryshaǵan» ótkelinde jolaýshylar poıyzy 21 bas qoıdy basyp ketti.
«Júrgizilgen is-sharalar nátıjesinde maldyń ıesi anyqtaldy. Ol 30 jastaǵy Qaraǵandy oblysy Saryshaǵan kentiniń turǵyny bolyp shyqty. Mal ıesi otar qoıdy temir joldyń burylys bóliginde jaıǵany úshin ákimshilik jaýapkershilikke tartyldy. Oǵan 5 AEK kóleminde aıyppul salyndy», - delingen Kóliktegi polıtsııa departamentiniń baspasóz qyzmeti málimetinde.
