Poıyzǵa soqtyǵysqan júk kóliginiń júrgizýshisi Qulsarydaǵy aýrýhanada jatyr
ATYRAÝ. KAZINFORM — Beıneý-Qulsary ýchaskesindegi temirjol ótkelinde júk kóligi men poıyz soqtyǵysqan edi. Qazir júk kóliginiń júrgizýshisi Qulsary qalasyndaǵy ortalyq aýrýhanada jatyr. Bul derekti Atyraý oblystyq densaýlyq saqtaý basqarmasynyń baspasóz qyzmeti rastady.
— KamAZ júrgizýshisi dene jaraqattarymen Jylyoı aýdandyq ortalyq aýrýhanasyna jetkizildi. Júrgizýshiniń keýdesinde jabyq, onyń ishinde ókpesinde jaraqaty bar. Mańdaıy men oń qolynyń terisi jyrtylǵan. Sol jaq tize býynyń jumsaq tinderi zaqymdanǵan, - dep málim etti basqarmanyń baspasóz qyzmetinen.
Temirjoldaǵy apattan zardap shekken júk kóliginiń júrgizýshisi Aqtóbe oblysynyń Qýraıly aýylynda turatyny anyqtalǵan. Onyń jasy — 33-te.
«Qazaqstan temirjoly» UK» AQ-nyń baspasóz qyzmetinen málim etkendeı, oqıǵa keshe, 23 jeltoqsanda bolǵan.
— Beıneý-Qulsary ýchaskesindegi temirjol ótkelinde júk kóligi poıyzben soqtyǵysty. Qurban bolǵandar men zardap shekkender joq. Avtomatty jyljymaly dabyl qurylǵylary durys jumys isteıdi. Oryn alǵan oqıǵanyń sebepteri anyqtalady. Oqıǵanyń aldyn-ala sebebi — júrgizýshiniń jol erejesin buzýy, - dep málim etken edi kompanııanyń baspasóz qyzmeti.
Eske sala ketelik, budan buryn Atyraýda jol apatynyń kóbeıýine ne sebep bolatynyn jazǵan edik.