Poıyzdardyń keshigýi azaıdy ma

ASTANA. KAZINFORM — «Qazaqstan temir joly» UK» AQ basqarma tóraǵasy Talǵat Aldybergenov poıyzdardyń keshigýine temirjoldyń tozýy áser etip otyrǵanyn aıtty.

— Bul másele áli de bar. Biraq jolaýshylar qaýipsizdigi jáne jolaýshylar poıyzynyń kestesin saqtaý — bizdiń basty mindetimiz, ıaǵnı qaýipsizdikke erekshe ekpin qoıylǵan, — dedi T. Aldybergenov Úkimet otyrysynan keıin tilshiler suraǵyna jaýap bere otyryp. 
Onyń aıtýynsha, qazir temirjoldyń tozýy 57 paıyzdy qurap otyr. Osyny eskere otyryp, iri kólemde jol jóndeý jumystary atqarylyp jatyr (jylyna 1400 shaqyrym).
— Qazirgi kezde poıyzdar boıynsha keshigýdiń azaıýy 37 paıyzdy qurady, — dedi QTJ basshysy.

Buǵan deıin temirjol salasyndaǵy iri jobalar qashan paıdalanýǵa beriletinin jazǵan edik. 
Qazirgi kezde 5 joba boıynsha jańa qurylys jumystary júrip jatyr. Olar: «Dostyq — Moıynty», «Almaty aınalma temirjoly», «Darbaza — Maqtaaral», «Moıynty — Qyzyljar» jáne «Baqty — Aıagóz». Osy jyly merziminen buryn eki iri joba aıaqtalady: «Dostyq — Moıynty» ýchaskesi jáne Almaty aınalma temirjoly.

Bıyl shilde aıynda Kólik mınıstri Nurlan Saýranbaev keshigip keletin poıyzdar máselesin sheshýge ınfraqurylym men ınvestıtsııaǵa baılanysty aýqymdy jumysty iske asyrý kerek ekenin aıtty.