Poıyzdardaǵy beınekameralar endi qaýip týraly eskertpek
ASTANA. KAZINFORM – Qazaqstanda jolaýshylar poıyzdaryna beınetaldaý tehnologııasyn engizý josparlanyp otyr. Jańa júıe qaýipti jaǵdaılardy der kezinde anyqtaýǵa múmkindik bermek. Bul týraly «Jolaýshylar tasymaly» AQ basqarma tóraǵasy Ánýar Ahmetjanov Astanadaǵy «Nurly jol» vokzalynda ótken jolaýshylar poıyzdarynyń tsıfrlyq ekojúıesiniń tanystyrylymynda málimdedi.
Onyń aıtýynsha, búginde jolaýshylar poıyzdarynda 4 myńnan astam beınebaqylaý kamerasy ornatylǵan. Olar qyzmet kórsetý sapasyn, poıyz qyzmetkerleri men merdiger uıymdardyń jumysyn baqylaýǵa, sondaı-aq túrli oqıǵalardyń mán-jaıyn anyqtaýǵa kómektesedi.
- Eger júıe oqıǵalardy jazyp alyp, kórsetip qana qoımaı, qaýipti jaǵdaılar týraly der kezinde eskertip, tıisti sheshim qabyldaýǵa kómektese alsa she? Qazir biz osy baǵytta jumys istep jatyrmyz, – dedi Ánýar Ahmetjanov.
Onyń sózinshe, spýtnıktik baılanystyń damýy beınetaldaý tehnologııasyn engizýge tehnıkalyq múmkindik beredi.
- Bolashaqta mundaı júıe yqtımal qaýipti jaǵdaılardy jyldam anyqtaýǵa, jolaýshylarǵa qyzmet kórsetý sapasyn arttyrýǵa jáne tasymal jumysyn tıimdi uıymdastyrýǵa kómektesedi. Kelesi jyly beınetaldaý júıesin engizý jumysyn aıaqtaýdy josparlap otyrmyz, – dedi basqarma tóraǵasy.
Aıta keteıik, búginde ulttyq tasymaldaýshynyń 51 baǵyt boıynsha qatynaıtyn 108 poıyz quramyndaǵy 1500-den astam vagon Starlink spýtnıktik ınternetimen jabdyqtalǵan. Jańa baılanys júıesi jolaýshylarǵa ınternet qyzmetin usynýmen qatar, poıyz qyzmetkerleriniń jumysyn jeńildetýge jáne qaýipsizdikti arttyrýǵa baǵyttalyp otyr.
