Poıyzdarda jolaýshylarǵa arnalǵan ınternet tegin bola ma
ASTANA. KAZINFORM – Búgin Úkimet otyrysynda «QTJ» UK» AQ Basqarma tóraǵasy Eljas Otynshıev jolaýshylar poıyzdaryn ınternetke qosý jumysyn túsindirdi.
- Jolaýshylarǵa kórsetiletin qyzmet sapasy men jaılylyǵyn arttyrý úshin poıyzdarda ınternet qosý jumystary aıaqtaldy. Búginde 51 baǵyttaǵy 108 poıyzdyń 1 500-den astam vagony Starlink spýtnıktik ınternetimen jabdyqtalǵan. Bul qyzmetti jyl saıyn 11 mln-nan astam jolaýshy paıdalana alady. Qazirgi ýaqytta «Transtelekom» kompanııasymen birlesip jolaýshylarǵa ınternet qyzmetin usyný sharttary pysyqtalyp jatyr. Aitu, WhatsApp jáne Telegram messendjerlerinde mátindik habarlamalar almasý, sondaı-aq jolaýshylarǵa arnalǵan servıstik aqparat tegin usynylady, - dedi QTJ basshysy.
Sonymen qatar ol jalpy saladaǵy tsıfrlyq júıege toqtaldy.
- Tsıfrlyq júıe júk jáne jolaýshylar tasymalyn uıymdastyrýdan bastap, poıyz qozǵalysyn basqarý, júkti jetkizý jáne jolaýshylarǵa qyzmet kórsetýge deıingi barlyq protsesti qamtıdy. Negizgi maqsat — jekelegen protsesterdi tsıfrlandyrýmen shektelmeı, barlyq tasymaldaý protsesin ózara baılanysqan biryńǵaı tsıfrlyq júıege biriktirý. Onyń turaqty ári úzdiksiz jumysyn qamtamasyz etý úshin magıstraldyq temirjol jelisinde LTE-R tehnologııasy negizinde QTJ-nyń jeke tórtinshi býyn (4G) baılanys jelisi qurylady. LTE-R poıyz qozǵalysyn basqarý, qaýipsizdikti qamtamasyz etý jáne tehnıkalyq qyzmet kórsetý úshin derekterdi turaqty jetkizýge múmkindik beredi. Joba 16 000 shaqyrymnan astam magıstraldyq temirjol jelisin qamtıdy. Eki kezeńde shamamen 2 800 bazalyq stantsııa ornatylady, - dedi E.Otynshıev.
Birinshi kezeń - TransQazaqstan temirjol jelisi men Astana – Almaty baǵyty 2027 jyly aıaqtalady. Bul tasymaldaý protsesiniń tıimdiligin 10–15% arttyrýǵa múmkindik beredi.
Buǵan deıin habarlanǵandaı, Úkimet otyrysynda Premer-mınıstri Oljas Bektenov «Qazaqstan temir joly» kompanııasy bir aı merzimde tasymaldaý týraly derekterdi biryńǵaı derekter qoımasyna berýdi aıaqtaýy tıis ekenin aıtty.
