Poıyzdar men ushaqtardy ınternetpen qamtamasyz etý qarqyny qalaı
ASTANA. KAZINFORM – 5G jelisiniń 4 myńnan astam bazalyq stantsııasy ornatyldy. Bul týraly búgin Úkimet otyrysynda QR Premer-mınıstriniń orynbasary – Jasandy ıntellekt jáne tsıfrlyq damý mınıstri Jaslan Mádıev málim etti.
- 20-dan astam qalada 5G jelisiniń 4 myńnan astam bazalyq stantsııasy ornatyldy. Beeline jáne Starlink Mobile kompanııalarymen birlesip, Direct-to-Cell tehnologııasyn iske qostyq. Ol spýtnık pen smartfon arasyndaǵy tikeleı baılanys arqyly eldiń kez kelgen núktesinde habarlama jiberýge jáne ınternettiń bazalyq qyzmetterin paıdalanýǵa múmkindik beredi (navıgatsııa jáne messendjerler arqyly sms jiberý). Tehnologııa Android-ta qoljetimdi, al iOS boıynsha jumys jalǵasyp jatyr, - dedi J.Mádıev.
Onyń aıtýynsha, 50 temirjol baǵyty boıynsha júretin 124 poıyzdyń 1 500 vagony ınternetpen qamtyldy. 7 ushaq pen 50 týrıstik nysandy ınternetke qosý jumystary jalǵasyp jatyr.
- Jalpy uzyndyǵy 4 511 shaqyrym bolatyn «Batys – Shyǵys» gıpermagıstraliniń jartysy tartyldy. Jyl sońyna deıin paıdalanýǵa beremiz. Internetke 370 aýyl qosyldy. 12 myńǵa jýyq shaqyrym baılanys jelisi tartyldy. Bıylǵy jospar – 1 600 aýyldy ınternetke qosý. 2027 jyly oblystyq jáne respýblıkalyq mańyzy bar 40 myń shaqyrym avtojoldy baılanyspen qamtý josparlanǵan. Bul úshin 500-den astam antenna-machtalyq qurylym ornatý kózdelgen, - dedi Úkimet basshysynyń orynbasary.
Buǵan deıin habarlanǵandaı, qalalyq servısterdi basqarý boıynsha Astana tájirıbesi el óńirlerinde engiziledi.
