Poıyzdaǵy álimjettik byltyr sarbazdar áskerden qaıtyp bara jatqanda bolǵan

ASTANA. KAZINFORM — Іshki ister mınıstrligi poıyz tambýrynda soqqyǵa jyǵylǵan sarbaz oqıǵasyna pikir bildirdi. 

— Áleýmettik jelide poıyz tambýrynda Ulttyq ulan sarbazyn uryp-soqqan vıdeo anyqtaldy. Bul oqıǵa 2023 jyldyń kúzinde, qyzmet merzimi aıaqtalǵannan keıin zapasqa shyǵarylǵan merzimdi áskerı qyzmetshiler úıine qaıtyp bara jatqanda bolǵan. Osy fakt boıynsha keshe, 23 qyrkúıekte Qylmystyq kodekstiń 440-baby 1-bóligi (áskerı qyzmetshiler arasynda baǵynyshtylyq qatynas bolmaǵan kezde olardyń arasyndaǵy ózara qarym-qatynastyń jarǵylyq qaǵıdalaryn buzý) boıynsha qylmystyq is qozǵaldy, — dep habarlady polıtsııa.

ІІM málimetinshe, búkil qatysýshy, atap aıtqanda, kýáger, jábirlenýshi jáne kúdiktiler anyqtalǵan.

— Kúdiktilerdi ustaýǵa baǵyttalǵan sharalar qabyldandy. Tergeý barysy Іshki ister mınıstri Erjan Sadenovtyń jeke baqylaýynda, — delingen habarlamada. 

Eske sala keteıik, poıyz tambýrynda úsh jigittiń sarbazdy uryp jatqan vıdeosy taıaýda jelide tarady. 

QR Prezıdentiniń keńesshisi — Prezıdenttiń Baspasóz hatshysy Berik Ýálı Memleket basshysynyń áskerdegi álimjettikke qatysty Іshki ister mınıstrine shuǵyl tapsyrma júktegenin málimdedi.

Jazbaǵa qaraǵanda Prezıdent belgisiz adamdardyń Ulttyq ulan sarbazyn poıyz tambýrynda urǵany taspalanǵan beınematerıalmen tanysyp shyqqan.