Poıyzda jolaýshylardyń bıletsiz júrýine jol bergen qyzmetkerler jumystan bosatylady

ASTANA. KAZINFORM – 2025 jyldyń naýryz aıynyń sońynda №85/86 «Astana – Shymkent» jáne №3/4 «Astana – Almaty» baǵyttaryndaǵy poıyzdarǵa júrgizilgen tekseris barysynda alty jolaýshynyń bıletsiz júrgeni anyqtaldy.

«Jolaýshylar tasymaly» AQ baspasóz qyzmetiniń habarlaýynsha, qazirgi ýaqytta atalǵan faktilerge baılanysty qyzmettik tekserýler júrgizilip jatyr. Nátıjesinde kináli poıyz brıgadalarynyń qyzmetkerleri tártiptik jaýapkershilikke tartylyp, jumystan bosatylady.

Jyl basynan beri bıletsiz jolaýshylarǵa qatysty 14 fakti tirkeldi. Mundaı ishki baqylaý sharalary Ulttyq tasymaldaýshynyń barlyq baǵyttary boıynsha turaqty negizde júzege asyrylýda.

- QTJ azamattardy bıletsiz tasymal jáne bıletterdiń zańsyz qaıta satylý jaǵdaılary týraly habarlap, buzýshylyqtardyń aldyn alýǵa birge úles qosýǵa shaqyrady, - delingen habarlamada.

Sondaı-aq onda Qazaqstan temir joly bıletsiz jolaýshylardy tasymaldaýǵa jol bermeýge baǵyttalǵan keshendi sharalardy júzege asyryp keletini aıtylǵan.

Bul rette poıyz brıgadalary jumysynyń ashyqtyǵyn arttyrý úshin qoǵam belsendileri men mass-medıa ókilderiniń qatysýymen turaqty ishki tekserýler júrgizip turady.

Osyǵan deıin poıyz bıletin kimder jeńildikpen satyp ala alatyny týraly jazdyq.