Poıyzda vagon terezesin syndyrǵan qostanaılyq jazalandy

AQTÓBE. KAZINFORM – «Oral – Astana» baǵytyndaǵy poıyzǵa mas kúıinde mingen 48 jastaǵy jolaýshy tereze syndyrǵan. Polıtsııa ony ustap, is sotqa joldandy.

Qandyaǵash stantsııasyndaǵy jelilik polıtsııa bóliminiń qyzmetkerleri «Oral-Astana» baǵytyndaǵy jolaýshylar poıyzynan mas júrgizýshini ustady. Qostanaı oblysynyń 48 jastaǵy turǵyny ishimdik ishken kúıi usaq buzaqylyq jasaǵan.

— Tekserý barysynda ishimdikke sylqııa toıyp alǵan er adamnyń tambýr esigindegi áınekti syndyrǵany anyqtaldy. Sonymen qatar quqyqbuzýshy bılik ókilderiniń zańdy talaptaryna qarsylyq tanytqan. Kólik polıtseıleri jolaýshyny Aqtóbe oblysy Áıteke bı stantsııasynda poıyzdan túsirip alyp, polıtsııa bólimine jetkizdi. Іshimdik ishkeni nemese qoǵamdyq oryndarǵa masań kúıinde kelgeni, usaq buzaqylyq jasaǵany, quqyq qorǵaý organy qyzmetkeriniń zańdy talabyna baǵynbaǵany úshin ákimshilik hattamalar toltyrylyp, materıal sotqa joldandy. Sot sheshimimen er adam kináli dep tanylyp, oǵan 85 AEK (334 220 teńge) aıyppul salyndy, — dep habarlady Kóliktegi polıtsııa departamentiniń baspasóz qyzmeti.

Aıta keteıik, byltyr ákimshilik quqyq buzýshylyqtar jasaǵan 698 adam jolaýshylar poıyzdarynan túsirildi. Onyń 672-i qoǵamdyq oryndarda masań kúıinde júrgen, 17-i usaq buzaqylyq jasaǵan.

Eske salsaq, jyl basynda tórt óńirde tas joldardyń jabylýyna baılanysty Ulttyq tasymaldaýshynyń poıyzdarymen shamamen 400 adam tasymaldandy.