Poıyzda úı janýaryn tasymaldaıtyn jolaýshylar neni bilýi tıis
ASTANA. KAZINFORM – Ulttyq tasymaldaýshy jolaýshylarǵa poıyzdarda janýarlardy tasymaldaý erejeleri týraly eske saldy. Bul týraly «Jolaýshylar tasymaly» AQ baspasóz qyzmeti málim etti.
— Jolaýshylar poıyzdarynda tek úı janýarlaryn tasymaldaýǵa ruqsat etiledi, olardyń sany ekiden aspaýy tıis (mysyqtar, ıtter, qustar).
— Basqa jolaýshylardyń jaılylyǵyn jáne qaýipsizdigin qamtamasyz etý maqsatynda, úı janýarymen jolǵa shyǵatyn jolaýshy kýpedegi barlyq oryndardy tolyqtaı satyp alýy qajet. Janýarlardy ıesiz poıyzǵa kirgizýge tyıym salynady.
— Qala mańyndaǵy poıyzdarda jolaýshylar arnaıy tasymaldaý quraldaryna (tor, jáshik, sebet) salynǵan eki úı janýaryn tegin alyp júre alady.
—Úı janýarlary men qustardy tasymaldaý tıisti veterınarııalyq pasporttar nemese anyqtamalar usynylǵan jaǵdaıda ǵana múmkin. Bul qujattardy poıyzǵa otyrǵyzý kezinde kórsetý mindetti.
Sonymen qatar, úı janýarlaryn alyp júrý barysynda olar úshin tolyq jaýapkershilik ıesine júkteledi. Janýar ıesi olardy (torda, jáshikte, sebette) stantsııa aýmaǵynda, poıyzǵa miný jáne túsý kezinde, sondaı-aq poıyz ishinde baqylaýda ustaýy qajet. Tamaqtandyrǵannan keıin tazalyq saqtap, artynan jınastyrýdy umytpaǵan jón.
— Іri tuqymdy ıtterge tumyldyryq pen qarǵybaý taǵý mindetti. Olardy alyp júrý kezinde salmaǵyna sáıkes eseptelgen bagaj tarıfi qoldanylady. Úlken ıtter tek birinshi vagonnyń paıdalanylmaıtyn tambýryna ornalastyrylady. It ıesi ony alyp júrýge jáne jol boıyndaǵy qaýipsizdigin qamtamasyz etýge tolyq jaýapty, — delingen habarlamada.
Al, eger zaǵıp janǵa serik bolatyn baǵyttaýshy ıt bolatyn bolsa, kez kelgen vagonda alyp júrýge ruqsat etiledi. Bul úshin qosymsha aqy alynbaıdy.
Sonymen qatar, vagon-meıramhanaǵa janýarlarmen kirýge tyıym salynady. Jolaýshylar men poıyz qyzmetkerleriniń ómiri men densaýlyǵyna qaýip tóndirýi múmkin janýarlardy tasymaldaýǵa jol berilmeıdi.
Ulttyq tasymaldaýshy jolaýshylarǵa úı janýarlarymen saparlaryn aldyn ala josparlap, tasymaldaý sharttary týraly aqparatty 1433 nómiri arqyly tegin bilýge nemese vokzaldaǵy bılet kassalarynan naqtylaýǵa bolatynyn eskertedi.
Eske sala keteıik, buǵan deıin QTJ temirjol ótkelinde ereje buzǵan jaıaý júrginshilerge jaýapkershilikti qatańdatatynyn jazǵan bolatynbyz.