Poıyzda mas kúıde júretin jolaýshylar kóbeıgen
ASTANA. KAZINFORM — Jyl basynan beri 200-den astam quqyq buzýshy jolaýshylar poıyzynan túsirildi, dep habarlaıdy Polisia.kz.
Jyl basynan beri kóliktegi polıtsııa departamentiniń qyzmetkerleri jolaýshylar poıyzdarynda jasalǵan 255 quqyq buzýshylyqty anyqtady.
Statıstıkaǵa sáıkes, quqyq buzýshylyqtardyń basym bóligi alkogoldik ishimdikterdi shamadan tys tutynýmen baılanysty. Osyndaı 225 derek tirkelgen.
Sonymen qatar, 17 usaq buzaqylyq faktisi jáne ózge de quqyq buzýshylyqtar anyqtaldy.
— Máselen, Beıneý stantsııasynda kólik polıtseıleri Mańǵystaý — Almaty baǵytyndaǵy jolaýshylar poıyzynan poıyz bastyǵynyń aktisimen Qyzylorda oblysynyń 35 jáne 44 jastaǵy eki turǵynyn túsirip aldy. Atalǵan azamattar vagonda alkogoldik ishimdik iship, balaǵat sózder aıtyp, qoǵamdyq tártipti buzǵan jáne ózge jolaýshylarǵa qolaısyzdyq týǵyzǵan. Quqyq buzýshylar qoǵamdyq orynda alkogoldik ishimdik ishkeni jáne usaq buzaqylyq jasaǵany úshin ákimshilik jaýapkershilikke tartylyp, olarǵa aıyppul salyndy. Sondaı-aq ustalǵandardyń biriniń buǵan deıin de osyǵan uqsas quqyq buzýshylyq úshin jaýapkershilikke tartylǵany anyqtaldy, — delingen habarlamada.
Kóliktegi PD azamattardy aınalasyndaǵylarǵa qurmetpen qarap, sapar barysynda tártipti saqtaýǵa shaqyrady.
Vedomstvo ókilderi alkogoldik ishimdikterdi shamadan tys tutyný kóbine quqyqqa qaıshy áreketterge sebep bolyp, jolaýshylar qaýipsizdigine qaýip tóndiretinin eske saldy.
Osyǵan deıin Aqtóbede jyl basynan beri poıyzdy 12 ret shuǵyl toqtatýǵa týra kelgenin jazǵan edik.
