Poıyzda qandaı áreketterge tyıym salynǵan

ASTANA. KAZINFORM - Poıyz el turǵyndary kóp paıdalanatyn kólik túrleriniń biri. Halyq kóp shoǵyrlanǵan jerde túrli oqys jaǵdaılar da zańǵa qaıshy áreketterdiń de kezdespeı turmaıtyny belgili. Osy rette «Jolaýshylar tasymaly» AQ poıyzdaǵy belgilengen tártip pen qaýipsizdik talaptary týraly eskertti.  

Barlyq jolaýshylardyń qaýipsizdigi men jaılylyǵyn qamtamasyz etý maqsatynda tómendegi áreketterge qatań túrde tyıym salynady:

1. Bıletsiz júrý

Poıyzǵa otyrý úshin jolaýshyda mindetti túrde jaramdy bılet bolýy qajet. Bıletsiz vagonda júrýge bolmaıdy. Eger jolaýshyda tekserý kezinde bılet bolmaǵan jaǵdaıda ony kelesi stantsııada túsirý múmkin.

2. Balalardy qujatsyz alyp júrý

Eger balanyń jeke basyn kýálandyratyn nemese ata-anasymen týystyqty dáleldeıtin resmı qujattar bolmasa, ony poıyzǵa otyrǵyzýǵa ruqsat etilmeıdi.

3. Aldyn ala tólemsiz jáne rásimdelmegen bagajdy tasymaldaýǵa

Bir jolaýshyǵa belgilengen normadan (35 kg) asatyn bagajdy aldyn ala tólem jasamaı jáne tıisti qujatty rásimdemeı alyp júrýge bolmaıdy.

4. Qujatsyz janýarlardy tasymaldaýǵa

Veterınarııalyq qujattary joq janýarlardy poıyzda tasymaldaýǵa qatań túrde tyıym salynady. Qajetti qujattar bolmaǵan jaǵdaıda jolaýshyǵa poıyzǵa otyrýǵa ruqsat berilmeıdi.

5. Poıyzda shylym shegýge

Poıyz ishinde shylym jáne elektrondy temeki shegýge qatań tyıym salynady.

6. Stop-krandy sebepsiz iske qosý

Tótenshe jaǵdaı bolmasa, stop-krandy basýǵa bolmaıdy. Mundaı áreket poıyz qozǵalysynyń kestesin buzyp, basqa jolaýshylarǵa qolaısyzdyq týdyrady jáne ákimshilik jaýapkershilikke ákeledi.

7. Tyıym salynǵan zattardy alyp júrý

Esirtki zattaryn, jarylǵysh nemese ótkir zattardy poıyzda tasymaldaýǵa múlde tyıym salynady. Mundaı zańbuzýshylyq anyqtalǵan jaǵdaıda, jolaýshy quqyq qorǵaý organdaryna beriledi.

8. Agressııa jáne janjal týyndatý

Fızıkalyq nemese psıhologııalyq agressııanyń kez kelgen túrine, onyń ishinde adamnyń ar-namysyna til tıgizý, balaǵattaý áreketterine de qatań túrde tyıym salynady. Bul erejeni buzǵan jolaýshy jaqyn mańdaǵy stantsııada poıyzdan túsirilýi múmkin.

9. Poıyz qozǵalysy kezinde túsý

Mundaı áreketter ómir men densaýlyqqa asa qaýipti jáne temirjol erejelerin óreskel buzý bolyp sanalady. Poıyzdan túsýge tek stantsııalarda jáne arnaıy esikter arqyly ǵana ruqsat etiledi.

10. Vagondy lastaýǵa nemese múlikti búldirýge

«Jolaýshylar tasymaly» AQ múlkin búldirý, vagon ishin lastaý nemese vandalızm áreketteri qatań túrde tyıym salynady. Bul erejeni buzǵan jolaýshy jaqyn mańdaǵy stantsııada poıyzdan túsirilýi múmkin.

11. Alkogoldik ishimdikterdi tutyný

Poıyzdyń barlyq vagondarynda alkogoldi ishimdikterdi tutynýǵa qatań tyıym salynady. Bul shekteý tek meıramhana-vagondarǵa qoldanylmaıdy, onda ishimdik ishý qoldanystaǵy tártipke saı ruqsat etiledi. Atalǵan talapty buzý jolaýshynyń ákimshilik jaýapkershilikke tartylýyna jáne kelesi stantsııada poıyzdan túsirilýine sebep bolýy múmkin.

Qyzmet kórsetý sapasyna qatysty suraqtar týyndaǵan jaǵdaıda jolaýshylar kelesideı baılanys arnalary arqyly habarlasa alady: WhatsApp messendjeri arqyly [phone] nómirine jazý; Vagondarda ornalasqan QR-kodty skanerlep, operatorǵa tikeleı WhatsApp arqyly habarlama joldaý; 1433 nómirine qońyraý shalyp, tegin anyqtama qyzmetin paıdalaný.

Bul erejeler «Temirjol kóligimen jolaýshylar, bagaj jáne júk-bagajdy tasymaldaý qaǵıdalaryna» sáıkes bekitilgen.

«Jolaýshylar tasymaly» AQ barlyq jolaýshylardy belgilengen talaptardy saqtaýǵa shaqyrady. Poıyz ishindegi tártip pen qaýipsizdik — ortaq jaýapkershilik.

Osyǵan deıin poıyzda jolaýshynyń jaǵdaıy nasharlasa, ne isteý kerektigi týraly jazdyq.