Poıyzda alyp júrýge tyıym salynǵan zattardyń tizimi belgili boldy
ASTANA. KAZINFORM — «Jolaýshylar tasymaly» AQ temirjol kóliginde tasymaldaýǵa tyıym salynǵan zattardyń tizimi usynyldy. Kompanııa Qazaqstan Respýblıkasynyń zańnamasyna sáıkes, qaýipti jáne tyıym salynǵan zattardy poıyzǵa alyp ótý áreketi qylmystyq jaýapkershilikke ákep soǵatynyn eske saldy.
Poıyzǵa qandaı zattardy alyp ótýge bolmaıdy?
● Jarylǵysh zattar men qurylǵylar, sondaı-aq pırotehnıkalyq buıymdar: salıýtter, feıerverkter jáne jarylys qaýpi bar ózge de zattar.
● Radıoaktıvti, esirtkilik jáne psıhotroptyq zattar, sondaı-aq tez tutanatyn suıyqtyqtar men hımııalyq qospalar: mysaly, benzın, metıl efıri, metanol jáne sol sııaqty qaýipti zattar.
● Tutanǵysh qatty zattar. Ýly, kúshti áser etetin jáne ýlandyrǵysh zattar (suıyq nemese qatty kúıde).
● Infektsııalyq nemese bıologııalyq turǵydan qaýipti materıaldar: juqpaly aýrý týdyrýy múmkin zattar men olardy qamtıtyn buıymdar.
● Barlyq túrdegi qarý-jaraq: atys qarýy, laqtyrmaly, elektrli, mehanıkalyq, gazdy jáne travmatıkalyq qarý, sondaı-aq, sýyq qarý: pyshaqtar, qanjarlar, shtyk, qylysh, palash, ıatagan, tesakı, kastet, kısten, stılet, shashka, semser jáne soqqy-drobıaşıı áseri bar ózge de zattar.
● Oq-dáriler men patrondar: soǵysqa arnalǵan, jaryq-dybystyq, holostyq, travmatıkalyq áseri bar, ańshylyqqa arnalǵan jabdyqtalǵan patrondar jáne basqa da atýǵa jaramdy snarıadtar.
— Sapar aldynda jolaýshylar vokzaldarda mindetti túrde qaýipsizdik tekserýinen ótedi. Búginde elimizdiń iri temirjol vokzaldary rentgen-televızııalyq qondyrǵylarmen, statsıonarlyq jáne qol metall detektorlarymen, sondaı-aq portatıvti anyqtaý qurylǵylarymen tolyq jabdyqtalǵan. Sonymen qatar, beınebaqylaý, dabyl berý jáne kúzet júıeleri úzdiksiz jumys isteıdi. Jolaýshylardyń qaýipsizdigin táýlik boıy polıtsııa qyzmetkerleri men kúzet uıymdarynyń ókilderi qamtamasyz etedi, — delingen habarlamada.
Kompanııanyń málimetinshe, jolaýshylar tasymalyndaǵy qaýipsizdikti kúsheıtý maqsatynda poıyzdarda beınebaqylaý júıesi kezeń-kezeńimen engizilip otyr. Qazirgi ýaqytta Talgo poıyzdarynyń 630 vagonyna (24 quram) 1 350 beınekamera ornatylǵan. Sonymen qatar 19 baǵytta júretin 46 meıramhana jáne bar-vagonda qosymsha 92 kamera iske qosyldy. Barlyq beınematerıaldar Sıtýatsııalyq ortalyqqa tikeleı túsip, onda mamandar árbir tótenshe nemese standarttan tys jaǵdaıdy jedel taldap, tıisti sheshimder qabyldaıdy.
Kompanııa jolaýshylardy bekitilgen erejelerdi saqtaýǵa jáne qaýipsiz ári jaıly sapardy qamtamasyz etýge baǵyttalǵan sharalarǵa túsinistikpen qaraýǵa shaqyrady.
Aıta keteıik, osy jyly ushaqtar men poıyzdarda ınternet qoljetimdi bolady.